سلسله صح و غلط و قصه طريفه

[center][center]الحلقة رقم 1

1- صح :-
في جزء " صح " بمناسبة بداية شهر رمضان .. دايما أحب أذكر بحديث مهم جدا مع بداية الشهر المبارك
ألا وهو حديث :

من صام رمضان))((إيمانا و احتسابا غفر له ما تقدم من ذنبه
إذن حتى تتحقق المغفرة ويُغفر لنا ما تقدم من ذنوبنا لابد من شرطان أن يصوم الإنسان إيمانا و إحتسابا الأمر يحتاج لنيةإيمانابالله و بما أنزل و بما فرضه علينا فنصوم لأنه فرض علينا يجب صيامهو لأنه من أركان الإسلام مش لأننا بنصوم علشان متعودين نصومعلشان كله بيصوم .. علشان عيلتنا كلها بتصوم لا الموضوع لازم يكون عبادة مش عادة بنصوم علشان ربنا فرض علينا صيام الشهر ده .. فبنتعبد لله بالصيام و إحتسابا : نحتسب الأجر و المغفره و إنى بصيامى هذا أحتسب أن يغفر الله لى ما تقدم من ذنبي ..وأنى سأثاب بهذا الصوم وممكن حد يسبق الثاني بكثيير بسبب النية الصحيحة .. فنحسن النية حتى يغفر لنا ما تقدم من ذنوبنا برحمة الله هذا كان توضيح بسيط جدا للحديث ... و نرجو تحقيق هذين الشرطين حتى يغفر الله لنا ما تقدم من ذنوبنا

2- غلط :-
طبعاومع بداية شهر رمضان .. تلاقوا كثييير جداااا من الأئمة في الخطب وتلاقيفي الراديو والتلفزيون حديث مشهوووور جدا مع بداية رمضان أظن أن كلكم سمعتوه كثير . الحديث هو خطبة الرسول عليه الصلاة والسلام المشهورة المزعومة :
عن سلمان رضي الله عنه قال خطبنا رسول الله صلى الله عليه وسلم في آخر يوم من شعبان قال يا أيها الناس قد أظلكم شهر عظيم مبارك شهر فيه ليلة خير من ألف شهر شهر جعل الله صيامه فريضة وقيام ليله تطوعا من تقرب فيه بخصلة من الخير كان كمن أدى فريضة فيما سواه ومن أدى فريضة فيه كان كمن أدى سبعين فريضة فيما سواه وهو شهر الصبر والصبر ثوابه الجنة وشهر المواساة وشهر يزاد في رزق المؤمن فيه من فطر فيه صائما كان مغفرة لذنوبه وعتق رقبته من النار وكان له مثل أجره من غير أن ينقص من أجره شيء قالوا يا رسول الله ليس كلنا يحد ما يفطر الصائم قال يعطي الله هذا الثواب من فطر صائما على مذقة لبن أو تمرة أو شربة من ماء ومن أشبع صائما سقاه الله من الحوض شربة لايظمأ حتى يدخل الجنة وهو شهر أوله رحمة ووسطه مغفرة وآخره عتق من النار فاستكثروا فيه من أربع خصال خصلتان ترضون بهما ربكم وخصلتان لاغنى بكم عنهما أما الخصلتاناللتان ترضون بهما ربكم فشهادة أن لاإله إلا الله وتستغفرونه وأماالخصلتان اللتان لاغنى بكم عنهما فتسألون الجنة وتعوذون من النار.
مش سمعتوه كثير ؟هذا الحديث رغم شهرته الكبيرة .. حديث منكر.. لا يصح ولا يثبت عن الرسول صلى الله عليه وسلم
الحديث ده لم يقله الرسول صلى الله عليه وسلم .. فيجب الحذر من هذا الحديث ومن ترديده لأنه ضعيف سندا ومتنه منكر
متنهيعنى محتوى الكلام به .. منكر يعنى يخالف أحاديث أخرى صحيحة .. وإن قاله
أمامك أحد حاول أن تنصحه بينك وبينه مش قدام الناس وتبينله أنه حديث غيرصحيح.

3- قصة طريفة :-
بمناسبة القيام في شهر رمضان
قال ابن الجوزي -رحمه الله -في كتابه أخبار الحمقى والمغفلين :
وكان أعرابي يصلي ، فأخذ قوم يمدحونه ويصفونه بالصلاح -وهو يصلي ويسمعهم - ، فقطع صلاته وقال : مع هذا إنى صائم..
نسأل الله الإخلاص ونعوذ بالله من الرياء ..
الرجل من كثر ما عجبه كلام الناس خرج من الصلاة علشان يقولهم انه صايم كمان .. مش بس بيصلي كويس ..ده كمان صايم علشان يبدأوا فقرة جديده في مدحه فالشاهد إننا يجب أن لا نعجب بكلام الناس عنا ولا نفرح بمديح الناس لنا فيسبب هذا الرياء فينا ويذهب الإخلاص وتذكر فعل سيدنا أبو بكر الصديق -رضى الله عنه- عندما كان يمتدحه أحد فكان يبكي ويقول :
اللهـــــــم أنت أعلم بي من نفســي
وأنـــــــا أعلــم بنفســــي منهــــــم
فاجعلنـــــي خيراً ممــا يحســـبون
وأغفر لي برحمتك ما لا يعلمون
ولا تؤاخذنــــي بمـــا يقولـــــــون
فنبدأ بالاخلاص إن شاء الله ونبعد عن الرياء حتى يُتقبل منا بفضل الله

[/center]
[/center]

ومع الحلقة رقم 2

من سلسلة" صح وغلط وقصة طريفة "
1- صح :-
زي مقلنا بالأمس حديث ثمرته هي مغفرته ما تقدم من الذنب
انهارده الفرصة رقم 2 لنيل نفس الجائزة ..
وزي مكانوا بيقولوا :

كل ما تشتري أكثر فرصتك في الفوز تكبر
وطبعا كل متزوّد الأعمال اللى ليها نفس الثواب .. يبقى فرصك في الفوز بهذا الثواب أكثر.طيب ايه بقه الفرصة الثانية ؟؟ الأولى كانت صيام شهر رمضان بس بشرطين .. ايمانا واحتسابااليوم حديثنا عن القيام بس برضه بشرطين .. هما نفس الشرطين .. ايمانا واحتساباقال رسول الله صلى الله عليه وسلم :
((من قام رمضانإيمانا واحتسابا غفر له ما تقدم من ذنبه "يبقىمثل ما قلنا بالأمس .. الأمر يحتاج لنية .. مش مجرد نروح نصلي تراويحعلشان اتعودنا من صغرنا نروح .. وعلشان كل الناس بتروح ويعنى حقعد انا في البيت وصحابي وعيلتى رايحين يلا انا كمان بدل مقعد لوحدى ..مش نروح نصلي التراويح والقيام علشان مبقاش الوحيد بين صحابي اللى مبروحش او علشان اروح اصلي مع صحابي وبعدها نخرج.
لازم قيام رمضان يحتاج لنية .. نية للتعبد .. مش مجرد عادة .. نجدد النيةواحنا رايحين نصلي .. رايحين نصلي عبادة لله خالصة لوجهه.. قيام علشان ربنا أراد منا قيام الشهر والرسول حثنا على قيامه .. طاعة لله واتباعا للنبي صلى الله عليه وسلم احتسابا يعنى نحتسب الأجر ويكون الأجر ظاهر قدام عيننا نرجو اننا نحصل الأجر ده

2- غلط :-
كثير نسمع بعض الخطباء أو الأئمة أو حتى إذاعة القرآن الكريم .. يقولك شهر رمضان شهر الأمة .. ويروح قايل حديث ..
الحديث ده بيتكرر كثير ..
الحديث بيقول :-
" رجب شهر الله ، وشعبان شهري ، ورمضان شهر أمتي"
مش سمعتوا الحديث ده قبل كده؟؟ اهو الحديث دهضعيفواللى مسمعوش قبل كده يعرف انه ضعيف علشان ممكن يسمعه في اى وقت مع بداية شهر رمضان .. وزى مقلنا التنبيهعلى اللى قال حديث ضعيف يكون بطريقه كويسه وبينك وبينه
3- قصة طريفة :-

بمناسبةالقيام وقراءة القرآن .. ينبغى ان نحرص على التركيز فيما نقرأ أو نسمع منالقرآن .. وإن أُشكل علينا فهم شئ أو لم نفهمه نرجع لكتاب للتفسير لنفهم
مش نفهم القرآن بمزاجنا على غير مراد الله..
مش زي الأعرابي اللى ذكر قصته ابن الجوزي -رحمه الله- في أخبار الحمقى والمغفلين..
قال ابن الجوزي -رحمه الله- :-
وصلى بعض الأعراب خلف بعض الأئمة في الصف الأول ، وكان اسم الأعرابي (مجرماً) فقرأ الإمام : والمرسلات عرفا ... إلى قوله (أَلَمْ نُهْلِكْ الْأَوَّلِينَ) فتأخر البدوي إلى الصف الآخر ، فقرأ الإمام : ( ثُمَّ نُتْبِعُهُمْ الْآخِرِينَ) ، فرجع إلى الصف الأوسط ،فقرأ الإمام : ( كَذَلِكَ نَفْعَلُ بِالْمُجْرِمِينَ) ، فولى هاربا وهو يقول : ما أرى المطلوب غيري.
يعنىهذا الأعرابي صلى خلف الإمام والظاهر إنه مش حافظ تلك السورة فكأنه أولمرة يسمع تلك السورة .. ولما سمع مفهمش معناه الحقيقى ومراد الله منهمفكرش يسال او يعرف التفسير .. لا .. فهم بمزاجه .. خد الكلام على ظاهره.. فكان هو في الصف الأول .. سمع الإمام يقول : ( ألم نهلك الأولين ) فساب الصف الأول ورجع لاخر صف .. لقى الإمام يقول : ( ثم نتبعهم الآخرين ) راح سايب الصف الآخر ودخل في اللى في النص .. لقى الإمام يقول : ( كذلك نفعل بالمجرمين ) وهو اسمه مجرم فساب الصلاة وطلع يجري .. وقال انا المقصود بالكلام ده
أكيد طبعا المقصود بالهلاك مش المصلين يعنى ولا أماكنهم جوه الصلاة .. لكن نعمل ايه بقى في المغفلين
فنحاولأن نفهم القرآن على مراد الله عزّ وجلّ يعنى نشوف كتب التفسير .. نسأل شيخيكون عارف التفسير .. منحاولش نفهم القرآن بمزاجنا .. لربما كان المعنىاللى فهمنا غير المقصود تماما..

ومع الحلقة رقم 3

من سلسلة
" صح وغلط وقصة طريفة "1
- صح :-

جزء صح بتاعنا انهارده .. حيكون حديث .. والحديث ده يتضمن احياء سنة... وانت رايح تصلى التراويح او وانتِ رايحة تصلي التراويحكتيير جدا بعد أول أربع ركعات تلاقى ناس كثير روحتوالأكثر منه بعد ال 8 ركعات وقبل صلاة الوتر تلاقى أفواااج بتمشيزي
الامام حيصلى
الوتر بره المسجد وهما طالعينلهطيب مشيوا ليه ؟؟ وراهم حاجه مهمه ؟؟
طيب تعبانين أو مريضين ؟؟
طيب قاموا ليه ؟؟مفيش كفاية كده نبقى نصلي في البيت بقه الوتر
طيب ده صح ولا غلط ؟؟لا غلط .. طيب ايه الصح ؟؟الصح إن الرسول عليه الصلاة والسلام قال :" إنه من قام مع الإمام حتى ينصرف كتب له قيام ليلة "
يعنى ايه بقه ؟؟ يعنى اللى يصلي مع الإمام لحد ما الإمام يخلص كتب ليه قيام الليلة .. يعنى الصح اننا نصلي مع الامام لحد ميخلص خااااالص وينصرف طيب احنا بنحب نصلي الوتر بليل في البيت قبل الفجر .. نعمل ايييييه ؟؟تصلى مع الامام الوتر ولما يسلم قوم صلى ركعة كمان .. يبقى انت مصلتش وتر وفي نفس الوقت مضيعتش عليك أجر قيام الليلة

2 غلط :
-كثير جدا لما حد يعمل عمل كويس أو عمل خير ..نلاقى الناس اتبسطت كده وراحت قايله :يا سلاااام .. فعلا .. زي ما النبي -عليه الصلاة والسلام - قال :" الخير في وفي أمتي إلى يوم القيامة"وتلاقى اللى معاه راح قايل : ااااه .. صدق رسول اللههو طبعا صدق رسول الله -صلى الله عليه وسلم - ..بس الرسول مقالش الكلام ده ..الحديث ده:لا أصل لهاختراع يعنى

حاجه مش موجوده فى كتب السنة أصلافنحذر من الحديث .. بس فيه حديث تانى صحيح ويفيد نفس المعنى ..حد عارفه ؟؟

الحديث الصحيح هو قال رسول الله عليه وسلم لا تزال طائفة من أمتي ظاهرة على الحق حتى تقوم الساعة
3- قصة طريفة :-
بمناسبة جزء الغلط الثابت في حلقتنا
كثير منا بيعمل الغلط علشان لقى الناس بتعمله
وده في حد ذاته غلط .. لأنه متأكدش اللى بيعملوه صح ولا غلط
اقرأ القصة ديه وانت تفهم :-
ذكر ابن الجوزي -رحمه الله- أن بعضهم قال :-
" و مررت بقوم اجتمعوا على رجل يضربونه ، فقلت لرجل يجيد ضربه : ما حال هذا ؟ قال : والله ما أدري ما حاله ، ولكنى رأيتهم يضربونه فضربته معهم لله عزّ وجلّ وطلبا للثواب "ده من غير ميعرف هما بيضربوه ليه أصلا .. وخلي بالك من حتة انه بيضربه لله وطلبا للثواب ديهكثير منا نفس الكلام شاف الناس بتعمل فعمل .. من غير ميعرف اللى بيعملوه صح ولا غلط
يعنى كثير يجيلك ايميل فيه حديث موضوع مكذوب .. من غير منفكر نعرف صحيح ولا لا .
على طوووووووووول ندوس على
Forwardوتكتب ايميلات صحابك وصحاب صحابك واللى يعرفوا صحابك واللى ميعرفوش صحابكوانت في دماغك انك بتعمل كده طلبا للثواب وبتعمله لله
وانت بتساهم في نشر كلام كذب عن النبي صلى الله عليه وسلم
والغريب ان لو جاله حديث صحيح .. ميبعتوش يقولك ما هو الناس تلاقيها عارفاه فلازم نتأكد قبل مننشر حاجه عن الدين أو نساهم في حاجه أنها صح ولا غلط مش علشان لقينا صحابنا بيعملوها .. نعملها

[center]ومع الحلقة رقم 4
من سلسلة" صح وغلط وقصة طريفة "1
- صح :-
في جزء صح اليوم هيكون مرتبط شوية بجزء غلط .. الاثنين في موضوع واحد وهو ممكن نقول عليه من احياء السنن

هو موضوع السحور فموضوع السحور مهم جدا
وللأسف لا يلتفت كثير منا لأهميته
قال الرسول صلى الله عليه وسلم :-
تسحروا فإن في السحور بركة "
الرسول صلى الله عليه وسلم أمرنا وحثّنا على السحور كثير منا لا يتسحر ولا يستيقظ للسحور .. يستيقظ على صلاة الفجر على طول
- ده إن صحي أصلا -
تسأله اتسحرت انهارده .. يقول لا ..
طيب لا ليه ؟!؟
مفيش أصلي مبعطش ولا بجوع يعنى .. مش محتاجله يعنى
تحس ان جمل بيتكلم مش انسان..
كثير ممكن يكون كده .. وكثير فعلا كده
فوالله لو لم يكن في السحور غير الاستجابة لأمر الرسول -صلى الله عليه وسلم- لكفى فالسحور به بركة تظهر بوضوح في وقت الصيام من الفرق بين النشاط والكسل بين اللى تلاقيه تعبان واللى تلاقيه فايق فنحرص على السحور إن شاء الله
ونحرص على اتباع أمر النبي عليه الصلاة والسلام
2 غلط :-
الحاجات الغلط ان كثير من الناس اللى مواظبة على سنة السحور بيتسحروا في وقت بدري عن وقت السحور
لاقي ناس بتتسحر قبل متنام ..ممكن قبل الساعه 12 ويصحى على الفجر

ده إن صحي-
ناس تتسحر قبل الفجر بساعتين وساعه لكلام ده غلط .. ده خلاف السنة
إن الرسول عليه الصلاة والسلام قال عجلوا الإفطار و أخروا السحور "
السنة إن السحور يكون في وقت السحر .. ولأن وقت السحر فيه بركة فكان في السحور بركة
ايه وقت السحر ده يعنى علشان مش واخدين بالنا ؟؟
السحر ده هو الوقت اللى قبل الفجر بحاجه بسيطة
علشان كده اتسمى السحور سحورا .. علشان بيبقى في وقت السحر فاللى بيتسحر قبل الفجر باربع وثلاث ساعات ده خرج السحور بره وقته فهو بكده ما أدركش السنة ولا فاز ببركة السحور
طيب انت متأكد ان السحور المفروض يبقى في الوقت ده قبل الفجر على طول ؟؟
طيب شوف الحديث ده .. وهو حديث في صحيح البخارييعنى أكيد صحيح -
" عن
أنس: أن نبي الله صلى الله عليه وسلم وزيد بن ثابت تسحرا فلما فرغا منسحورهما قام نبي الله صلى الله عليه وسلم إلى الصلاة فصلى . قلنا لأنس: كمكان بين فراغهما من سحورهما ودخولهما في الصلاة ؟ قال: قدر ما يقرأ الرجلخمسين آية"
يعنى الفرق بين انتهاء السحور والصلاة وقت قراءة خمسين آية .. يعنى ممكن حوالى ربع ساعه مثلا فالغلط تعجيل السحور .. والصح تأخيره لقبل الفجر بحاجه بسيطة يبقى نصحى قبل الفجر ب نصف ساعه نصلى ركعتين ونتسحر ونصلى الفجر
3قصه طريفه

قال ابن الجوزي -رحمه الله- :خرج رجل يشتري حمارا ، فلقيه صديق له فسأله : إلى أين ؟
فقال : إلى السوق اشتري حمارا ،
فقال : قل إن شاء الله
، فقال : ليس ها هنا موضع إنشاء الله ، الدراهم في كمي والحمار في السوق ،
فبينما هو يطلب الحمار سرق فرجع خائبا ، فلقيه صديقه ، فقال له : ما صنعت ؟
فقال الدراهم سرقت إن شاء الله ،
فقال له صديقه : ليس ها هنا موضع إن شاء الله
نستفيدان لما حد فينا يكون على غلط وحد ينصحه بالصح .. ميعاندش ويصر على الغلط علشان ميندمش ويرجع يحاول يعمل الصح ... بس بعد فوات الأوان ونستفيد برضه سرعة التنفيذ .. يعنى متأجلش حاجه كويسه .. لو حد نصحك بحاجه صح متأجلهاش .. نفذ فورا حاجه تانية نستفيدها .. أبدا متفكرش انك مستغنى وانك تقدر تعمل حاجه من نفسك .. لا احنا فى الاوقات محتاجين لربنا واحنا لا حول ولا قوة لنا إلا بالله .. مهما كبرت أو عليت انت فقير إلى الله
لما تهم بعمل شئ قل : إن شاء الله ..لا تنساها أبدا بدل متيجى تشترى الحمار تلاقى الفلوس طارت إن شاء الله[/center]

ومع الحلقة رقم 5

من سلسلة
" صح وغلط وقصة طريفة "
1- صح :-
مما دفعنى للحديث عن أمر السحور في الحلقة السابقةان أحد الأصدقاء أخبرني أنه لا يتسحر مطلقافكان الحديث بالأمس عن أمر النبي عليه الصلاة والسلام بالسحورطيب هل الأمر بالسحور يقتصر على أن بالسحور بركة أم أن هناك أمرا أخر

قال رسول الله صلى الله عليه وسلم :- " فصل ما بين صيامنا و صيام أهل الكتاب أكلة السحر " أى أن الفرق بين صيامنا وبين صيام أهل الكتاب هو السحور فالسحور مع أهميته .. هو فرق بيننا وبين أهل الكتاب
وهو مخالفة لأهل الكتاب فكما أمرنا بمخالفة أهل الكتاب فنحرص على السحور وتكون من نوايانا أننا نخالف اليهود والنصارى ومتخافوش خلاص بكره إن شاء الله حاجه تانية غير موضوع السحور

[b]2 غلط :-

إن شاء الله في هذا الجزء من الحلقات

ستفاجئون بكثير من الأحاديث التى نرددها ونعتقد أنها صحيحه ونرددها ونسمعها كثيرا وهي غير صحيحة
طبعا في شهر رمضان .. كلنا بنصوم .. واكيد كلنا بنفطر
عند المغرب طبعا
طيب اول ما الأذان بيأذن في لمح البصر تلاقي الواحد فينا ماسك التمر أو ماسك الكوب وحيبدأ بقه
بس طبعا فيه دعاء بنقوله قبل منفطر
إيه هو الدعاء ده ؟؟
ااااه بنقول :-
" اللهم لك صمت وعلى رزقك أفطرت وعليك توكلت "
مش كده برضه ؟؟ اه .. بس الحديث ده .. ضعيف !!ا
ضعيف بجد ؟؟ ايوا ضعيف ..
ومثبتش ان الرسول عليه الصلاة والسلام كان بيقول كده عند الإفطار امال نقول ايه ؟؟ ايه الصح
" ذهب الظمأ و ابتلت العروق و ثبت الأجر إن شاء الله "
3- قصة طريفة :-
من غير مقدمات خالص بقه المرة ديه
قال ابن الجوزي -رحمه الله- :
عن محمد الداري قال : كان عندنا رجل بدارا وكان فيه غفله ، فخرج من داراً ومعه عشرة أحمر - جمع حمار- ، فركب واحدا وعدّها ، فاذا هى تسعة ، فنزل

وعدّها فإذا هى عشرة ، فركبواحدا وعدّها ، فاذا هى تسعة ، فنزل وعدّها فإذا هى عشرة ،فلا زال كذلكمراراً ، فقال : أنا أمشي وأربح حمارا خير من أن أركب ويذهب مني حمار ،فرأيتُه يمشي حتى كاد يتلف - كان هيموت من التعب
- إلى أن بلغ قريته. !مش لاقى حاجه اقولها بصراحهلكنالمستفاد أننا كثيرا ما نفعل شئ خاطئ .. ولا ندري أننا نفعل الخطأ ويعدّىعلينا واحنا مش واخدين بالنا اننا بنعمل حاجه غلط .. فخلي ليك صديق يصدقك .. يظهر لك أخطائك .. فالصديق مرآة صديقه .. ولو حد نبهك لغلط بتعمله .. فكر فيه .. يمكن فعلا انت بتعمل غلط وانت مش واخد بالك .. متقولش ايه اللىجاى يقول اى كلام ده ؟! ازاى يقولى كده .. لا طبعا انا مش كدهلا فكر في النصيحة .. يمكن فعلا انت على غلطمش يمكن تكون فعلا راكب الحمار وعمال تعد اللى قدامك وناسي اللى راكبه !!ا

ومع الحلقة رقم 6من سلسلة

" صح وغلط وقصة طريفة "

1- صح :-
بالأمس تكلمنا في جزء " غلط " عن الحديث الضعيف الذي يقوله كثيييييييييير جدا من المسلمين عند الإفطار و يظنون أن هذا ثابت عن النبي صلى الله عليه وسلم
وهو غير ثابت بل هو حديث ضعيف
طيب إيه الصح اللى نقوله عند الإفطار ؟؟
إن من أصح الأحاديث في باب الأدعية عند الإفطار ولعله الحديث الوحيد الثابت في هذا الباب
هو حديث ابن عمر رضى الله عنهما قال كان رسول الله صلى الله عليه وسلم إذا أفطر قال :
" ذهب الظمأ و ابتلت العروق و ثبت الأجر إن شاء الله "
وهذا الحديث حسّنه كثير من أهل العلم
طيب هل يقال هذا الدعاء قبل الإفطار أم بعده ؟؟
عض أهل العلم قال أن هذا الدعاء يُقال بعد الإفطار ولكن الأمر واسع إن شاء الله كما قال العلّامة عبد المحسن العباد :
(وهذا الذكر يقال قبل الإفطار أو بعده، والأمر في هذا واسع)
إذن نحرص على نصحح ما كنا نقوله عند الإفطار وبدل منقول
(اللهم لك صمت وعلى رزقك أفطرت ..... ا)
قول ما ثبت عن النبي عليه الصلاة والسلام :
" ذهب الظمأ و ابتلت العروق و ثبت الأجر إن شاء الله
2 - غلط :-
كتير جدا لما حد نعرفه يُرزق بمولود .. أو حتى قبل أن يأتي المولود
تلاقى الناس عماله تسأله :
هاااااا .. هتسميه ايه ؟؟
على اسم جده ؟؟ ولا على اسم جدته ؟؟ويقعد بقه يعدله كل الأقارب
يروح قايله:لا لا .. سيبك من الكلام ده
أنا بقهحسميه : محمود أو أحمد أو محمد أو حمدي أو حميد أو حمدان أو
ايييييييه ياعم كل ده ؟؟
لا لسه .. أو عبد العزيز أو عبد الله أو عبد الرحمن أو عبد الحميد أو ....... ا
أصلي حتبع حديث الرسول عليه الصلاة والسلام ..
ايه بقى الحديث ده ؟؟
حديث :
( خير الأسماء ما عبّد وحمّد)

مممم .. عندك حق .. صدق رسول الله صلى الله عليه وسلم ثانية واحده .. صدق رسول الله عليه الصلاة والسلام فيما قال طبعا بس ده مش من كلام الرسول عليه الصلاة والسلامالحديث ده : لا أصل له يعنىاخترااااااااااااااع .. واحد شرب كوبايتين شاى وعمل دماغ وراح مألف الحديث ده الحديث لا اصل له في كل كتب السنةيبقى محدش ييجي بقه يقولك سمي كذا أو كذا علشان الرسول قال :خير الأسماء ما عبد وحمد .. قلهلاااا الرسول مقالش كده
لكن هناك من النصوص ما يدل على استحباب تسمية اسم : محمد لحديث : " تسموا باسمي " رواه مسلمو روى عن النبي استحباب تسميةعبد الله وعبد الرحمن و الحارث

عن انس قال رسول الله صلى الله عليه وسلم
( أحب الأسماء إلى الله عبد الله وعبد الرحمن والحارث )

3- قصة طريفة :-
ذكر ابن الجوزي -رحمه الله - :دخل بعض المغفلين على رجل يعزيه بأخ له ، فقال : أعظم الله أجرك ورحم أخاك وأعانه على ما يرد عليه من مسألة يأجوج ومأجوج، فضحك من حضر وقالوا له : ويحك ، أو يأجوج ومأجوج يسألان الناس؟ فقال : لعن الله إبليس ، أردت أن أقول هاروت وماروت !!!ا
جه يكحلها عماهاطبعا هو يقصد :
أكيد منكر ونكير
كثيرمنا بيتفزلك .. يعنى ميبقاش عنده علم في حاجه بس ده مبيمنعوش انه يسكتوميفتيش ..
لا كثير منا حتى وهو معندوش على فى مسألة ما يقعد يقول : بسأنا رأيي كذا وكذا ..
أنا شايف كذا وكذايعنى ممكن تيجيى تسأل واحد في حكم حاجه في الدين مثلا
ستخسر يقولك معرفش ..
الله أعلم
لا يروح قايل : بيتهيئلي يعنى أنه حلال لأنه عادي يعنى وأصل مفيش مانع
ومش مقتنع ان فيها حاجه ....
وهو أصلا ممكن يكون أول مرة في حياته يسمع عن الحاجه ديه
كثير بيقعد يتفزلك كده .. عايزين لو اتسألنا عن حاجه لو منعرفش نقول منعرفش مش عيب

ومع الحلقة رقم 7

من سلسلة

" صح وغلط وقصة طريفة "

1- صح :-

في هذا الشهر الكريم .. شهر رمضان

شهر القرآن .. ينبغي لنا ألا نترك القرآن وألا نقصّر في قراءة القرآن فالثواب كبير جدا

ففي حديث ابن مسعود رضى الله عنه

" من قرأ حرفا من كتاب الله فله به حسنة ، والحسنة بعشر أمثالها ، لا أقول: آ لم حرف . ألف حرف ، ولام حرف ، وميم حرف "

الحديث صححه كثير من أهل العلم مرفوعا للنبي عليه الصلاة والسلام - أى من قول النبي عليه الصلاة والسلام -وبعض أهل العلم قالوا بأن الحديث موقوف على ابن مسعود رضى الله عنه - أى أنه من كلام ابن مسعود-

فنحرص على قراءة القرآن فبكل حرف نقرؤه حسنة .. فهذا ثواب عظيم جدا والله يضاعف لمن يشاء

فنتخيل أن أحد قرأ في اليوم جزءا .. فكم حرف في الجزء ؟؟

كثير جدااااا
فبكل حرف إن شاء الله حسنة .. فإن شاء الله إن أحسنا القراءة وتُقبِّل منا كل حرف بحسنة

فهذا خير كبير ويكون إن شاء الله مرجّحا لميزان حسناتنا يوم القيامة ان شاء الله

ونحرص على التلاوة الصحيحة والقراءة المنضبطة بالأحكام
وأعلموا أن الله عزّ وجلّ قال :-

" الَّذِينَ آتَيْنَاهُمْ الْكِتَابَ يَتْلُونَهُ حَقَّ تِلَاوَتِهِ أُوْلَئِكَ يُؤْمِنُونَ بِهِ "

فنحرص على تلاوة القرآن حق تلاوته ونتعلم التلاوة الصحيحة

فنبدأ نشد في القراءة ونحاول نختم كذا مرة .. الأيام ديه فرصة والله .. فرصة متتعوضش

2 - غلط :-

بمناسبة قراءة القرآن في هذا الشهر .. وينبغى أن نحافظ على القراءة طول العام ولا نهجر القرآن

كثير منا يكون هيقرأ القرآن ويكون لسه بيتعلم مثلا فبيغلط ..
بس يكون بيتعلم مش بيغلط وسايب نفسه كده عمال يغلط

فييجي حد يسمعه .. يروح قايله مينفعش كده ايه الغلط ده .. لازم تقرا صح - طيب هو بيتعلم يعمل ايه طيب !!! إن شاء الله حيتعلم ويقرأ صح-ا

انت مسمعتش ان الرسول عليه الصلاة والسلام قال

" رب قارئ للقرآن والقرآن يلعنه "

أو واحد يكون بيقرأ كده بس تحس انه سرحان شوية .. برضه حد يجيله ويروح قايله نفس الحديث

سمعتوا الحديث ده قبل كده ؟؟

أهو الحديث ده مش من كلام النبي صلى الله عليه وسلم

ايه مش من كلام النبي فعلا !! ده تقريبا كلنا عارفينه ؟؟

اه مش من كلام النبي عليه الصلاة والسلام

الحديث ده ذكره الغزّالي في إحياء علوم الدين بدون سند .. من غير أى سند

فالحديث غير صحيح ولا يصح نسبته للرسول عليه الصلاة والسلام

فلنحذر من قول هذا الحديث ولو سمعناه من حد .. زي متفقنا نوضح بس برااااحه

وده مش معناه اننا نقرا القرآن بقه غلط ومش مشكلة .. لا طبعا لازم نتعلم ونقرأ صح .. ولما نقرأ القرآن نتدبره ونركز .. هذا كلام الله

3- قصة طريفة :-

ذكر ابن الجوزي -رحمه الله- :-

عن عبد الحمن بن داوود ، قال : لقى تاجر تاجرا فقال له : ما اسمك ولا تطول ؟ فقال : أبو عبد منزِّل القطر عليكم من السماء تنزيلا الذي يمسك السماء أن تقع على الأرض بإذنه ، فقال : مرحبا بك يا ثلث القرآن .

طبعا هو اسمه عبد الله او عبد الرحمن مثلا بكن هو حب يتفزلك

كثير جدا ممكن تسأل حد سؤال وممكن الجواب يكون في كلمتين .. ياخدك ويوديك وتروح وتيجى ويقعد يرغي لحد متنسى أصلا انت بتكلمه ليه ولا مين ده اصلا

و ممكن تكون ساعتها متضايق أو مزاجك مش قد كده فتبقى عايز اللى قدامك ينجز .. فيستفزك بكثر كلامه .. وفعلا تتخنق منه

وأيضا ممكن كثير جدا حد يسألنا عن حاجه ويبقى مخنوق او مستعجل أو وراه حاجه أو متضايق

نقعد بقه نرغي بدون لازمة .. نطول بدون داعي مع ان ممكن نرد في كلمتين

نخلي بالنا ان حتى لو اللى قدامنا مزاجه كويس لو جاوبته بكلمتين مش حيتضايق لكن لو قعدت ترغي ممكن يتضايق
فنحرص على الرد على الأسئلة بالمختصر المفيد وعلى قد السؤال

إن ما قل ودل خير مما كثر وألهى

مش حد ييجي يسالك ويكون رايح مسجد يصلي فيه تراويح مثلا والمسجد جنبك بشارع وهو مش عارف .. فيسألك :
لو سمحت جامع أمير المؤمنين فين ؟؟

تقوله بص حضرتك .. هات أول ودوس على البنزين وارفع من على الدبرياش وامشى براحه وبعدين انقل على التانى وبص يمينك حتلاقى كشك سيبك منه لأنه بيبيع سجاير ولو شافك بتبصله وانت راجل متدين يفتكر انك حتشرب سجاير فتفتن الناس ويفتكر ان بيعه للسجاير حلال رغم ان وزارة الصحة محذرة منها وبتقول ضار جدا بالصحة ... وووووو والتراويح تخلص وهو لسه مجابش أول ولا اتحرك من مكانه

لا لو حد سألنا نقول : بص حضرتك يمين فى ثاني شمال مثلا .. ولو مش متأكدين نقول معرفش حضرتك اسال حد تانى

منفتيش

كده خلصت الحلقة السابعة يارب متكونوش زهقتوا

و غدا إن شاء الله نلتقى في الحلقة الثامنة

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 8

من سلسلة

" صح وغلط وقصة طريفة "

1- صح :-

في حلقة سابقة أشرنا إلى أن حديث

"الخير في وفي أمتي إلى يوم القيامة"

ليس بحديث وأنه لا أصل له

وقلنا تاني يوم ايه هو الحديث الصحيح اللي في نفس المعنى

" لا تزال طائفة من أمتي ظاهرة على الحق حتى تقوم الساعة"

فهذا هو الحديث الذي نقوله بدلا من الحديث الأخر الذي لا أصل له ويفيد نفس المعنى

فالخير موجود في هذه الأمه لا ينقطع .. وينبغي أن نشرّف أنفسنا بهذا الخير

فقد قال الله عزّ وجلّ :

" كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنْ الْمُنكَرِ وَتُؤْمِنُونَ بِاللَّهِ "

فلنأمر بالمعروف وننهى عن المنكر ونؤمن بالله .. فالخيرية لهذه الأمة بهذه الأمور

فلنحرص على الأمر بالمعروف والنهى عن المنكر وعلى تغيير المنكر بأنواعه

2 - غلط :-

نرررررجع بالذاكرة للخلف شوية .. لا كمان شوية

ايوااا لحد مبدأ شهر رجب

فاكرين لما بدأ شهر رجب

افتح الراديو على إذاعة القرآن الكريم أو أى حاجه في التلفزيون لنقل أى احتفال بشهر رجب من الحاجات اللى بيعملوها ديه

ويقولك احتفالا بليلة الإسراء والمعراج أو احتفالا مش عارف بايه وحاجات كده

تلاقي المذيع في الراديو أو في التلفزيون و للأسف كثير من الشيوخ في الراديو أو التلفزيون أو حتى على المنابر في الخطب

يقولوا حديث مشهووووووووووووووووووور جدااااااااااااااااا

يروحوا قايلين : قال رسول الله صلى الله عليه وسلم

" اللهم بارك لنا في رجب و شعبان و بلغنا رمضان "

ويقعد يقول صدق رسول الله .. صدق رسول الله

وطبعا زي ما اتعودنا .. طبعا صدق رسول الله صلى الله عليه وسلم فيما قال

لكن هذا حديث غير ثابت عن النبي صلى الله عليه وسلم

فالحديث : ضعيف

لا بقه انت بتهزر .. ضعيف مين ياعم الحاج .. انت بقه كل منحفظلنا حديث تقولنا ضعيف .. بتتكلم بجد ؟؟

اه بتكلم بجد .. الحديث ضعيف
واللى مش مصدق ينظر : كتاب ضعيف الجامع للألباني حديث رقم 4395 .
ومش معنى ان الحديث مشهور يبقى لازم يكون صحيح .. كثيرا
ما اشتهرت أشياء غير صحيحة والعبرة بالثبوت عن النبي ولا لا
العبرة بهل النبي عليه الصلاة والسلام قال كده ولا لا .. هل الحديث ثبت عن الرسول ولا لا

والجواب ان الحديث غير ثابت .. الحديث ضعيف

واحنا اتفقنا ان في هذا الجزء .. جزء " غلط " حنتفاجأ بأحاديث كثير كنا فاكرينها صحيحه .. وهي غلط .. مش صحيحه

فلو سمعته أعرف أنه مش حديث صحيح وزي متفقنا لو حد قالك قدامك تعمل ايه ؟؟

برااااحه

3- قصة طريفة :-

ذكر ابن الجوزي -رحمه الله- :

" خرج بعض المغفلين من منزله ومعه صبي عليه قميص أحمر ، فحمله على عاتقه ثم نسيه ، فجعل يقول لكل من رأه : رأيت صبيا عليه قميص أحمر ؟؟ فقال له انسان : لعله الذي على عاتقك ؟! فرفع رأسه ولطم الصبي وقال : يا خبيث ألم أقل لك إذا كنت معى لا تفارقنى !!ا

المشكلة إن الولد على كتفه كل ده وبرضه راح ضارب الولد بالقلم

طيب الولد ماله ؟!!ا

كثير جدا احنا نفسنا بنبقى كده

نبقى غلطانين ومش واخدين بالنا ونحمّل الغلط على غيرنا ..و منعترفش بالغلط

كثير بنعمل كده .. لا لازم لو في اى وقت عرفنا اننا غلطنا
نعترف بغلطنا ونعتذر مش نحمل الموضوع على غيرنا ونعاقب غيرنا

الإعتراف بالغلط مش عيب لكن العيب هو التمادي في الغلط .. والمفترض اننا منكبرش عن الاعتراف بالغلط .. كل بني آدم خطاء خير الخطائين التوابون

وأول خطوة في التوبة .. هو الاعتراف بالخطأ

ثاني حاجه : قبل متوجه تهمه لحد أو تحمل حد الغلط .. أتأكد الأول ان الغلط مش منك .. واسال يمكن انت مش واخد بالك
بدل متضرب الواد على الفاضي وهو على كتفك

كده خلصت الحلقة الثامنة

و غدا إن شاء الله نلتقى في الحلقة التاسعة

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 9

من سلسلة

" صح وغلط وقصة طريفة "

1- صح :-

طبعا في شهر رمضان كلنا بنصلي الفروض -واكيد في غير رمضان- وكمان بفضل الله بنصلي التراويح

طيب اكيد كلنا بنتوضأ

ولا حد عنده راى تانى ؟؟

المهم حديثنا اليوم عن الوضوء

كلنا بنتوضأ كل يوم أكيد
فيه حديث مهم جدا في الوضوء .. وهو

قال رسول الله صلى الله عليه وسلم :

" ما منكم من أحد يتوضأ فيسبغ الوضوء ثم يقول حين يفرغ من وضوئه: أشهد أن لا إله إلا الله وحده لا شريك له و أن محمدا عبده و رسوله إلا فتحت له أبواب الجنة الثمانية يدخل من أيها شاء "

شوف كلام سهل جدا حفظه .. بس شوفوا الثواب ايه ؟!!!ا

سبحان الله

فتحت له أبواب الجنة الثمانية يدخل من أيها شاء

أجر عظيم .. لكن لكي نحصّل هذا الثواب بإذن الله علينا بالتالي :-

1- نقول قبل الوضوء
2- نسبغ الوضوء -بلاش كروته يعنى- اتوضا بذمة
3- نحفظ هذا الذكر السهل جدا ونقوله
أشهد أن لا إله إلا الله وحده لا شريك له و أن محمدا عبده و رسوله

مفييييييييش أسهل من كده وبلاش كسل

2 - غلط :-

بمناسبة الصلاة .. احنا في شهر رمضان تقريبا أكثر شهر بنصلى فيه

تلاقى كثير منا بيحافظ على السنن في هذا الشهر أكثر من غيره بالإضافة إلى التراويح والتهجد

وكثير كده واحنا بنصلى ورا الامام في التراويح والتهجد

نسرح شوية وكده

فنيجي نسال حد نقوله انا الصلاة سرحت كثير فيها

يقول بص بقه

قال رسول الله صلى الله عليه وسلم :-

" ليس للمرء من صلاته إلا ما عقل منها "

سمعتوا الحديث ده قبل كده ؟؟

اه كثييييييير

اهو ده بقه مش حديث عن الرسول اصلا

يعنى ليس من قول الرسول عليه الصلاة والسلام

ولا اصل له مرفوعا

- يعنى مش موجود في كتب السنة انه منسوب للنبي عليه الصلاة والسلام

إنما هو قول منسوب لسفيان الثوري -رحمه الله- ، وكذا أُشير أنه من اقوال ابن عباس وعمار بن ياسر
وانظر السلسلة الضعيفه للألبانى حديث رقم : 6941

لكن على كل حال هو ليس من كلام النبي صلى الله عليه وسلم

لكن معناه صحيح .. فنجتهد في التركيز في الصلاة والتدبر والخشوع

لان ما سها المرء فيه من صلاته الظاهر انه لا يُثاب عليه ولا يُأجر عليه

يبقى لو سمعنا الحديث ده نعمل ايييييييه ؟؟

خلاص كلنا حفظنا

نعرف انه مش حديث وبعدين ننبه من يقوله على انه مش من اقوال النبي عليه الصلاة والسلام .. بس زي متفقنا

برااااااااااحه
- قصة طريفة :-

علشان طولنا عليكم في الحلقة ديه .. القصة حتبقى قصيرة جدا

بس التعليق طوييييييل

ذكر ابن الجوزي -رحمه الله- :

" أصيب بعضهم بمصيبة - ماتله ميت يعنى - فقيل له : عظّم الله أجرك، فقال : سمع الله لمن حمده. "

!!!!

ايه اللى جاب الرد ب: سمع الله لمن حمده هنا !!ا

كثير اوى من الناس بيحب يمثّل

يعنى تبقى راكب الاسانسير وانت نازل تصلي مثلا ويشوفك كده شكلك ملتزم تلاقيه خلاص

فُتِحَ عليه في الذكر فتحا مبينا

تلاقيه عمّال يذكر الله ولازم يسمّعك .. مينفعش يذكر في سره .. لاااااااااااازم يسمّعك

لازم يقول اى حاجه حافظها وخلاص

ونفس الكلام .. وانت رايح المسجد مثلا تعدى جنب حد تقوله السلام عليكم .. وهو اصلا ممكن يبقى ماشي سرحان
يروح رادد السلام ويبدا في وصلة ذكر .. وطبعا لازم بالشرط المعروف

لازم يسمّعك حتى لو انت بعيد عنه

برضه الاخت تبقى نازله ملتزمة بحجابها تقعد جنب واحده ممكن تكون متبرجة في اتوبيس مثلا تلقى السلام .. التانية ترد السلام وتبدأ بقه في حلقة الذكر

وتقعد تقول اذكار غريبة !! ولازم طبعا

تسمّعها

انا نفسي افهم ليييه لازم يسمّعك .. ليه بنحب نمثل !!ا

انا مش بقول بيمثل علشان بيذكر .. لا لأنه قبل ميشوفك كان فعلا ساكت .. وبعدين لما شافك كانه عايز يثبتلك انه برضه مش سهل .. فعمّال بقه ولازم يسمّعك .. مينفعش يتكلم في سره

زي ميكون بيذكر ربنا علشانك انت مش علشان ربنا !!ا ..
مينفعش يعنى يذكر في سره ويخفي عمله

ربنا يرزقنا الاخلاص

برضه لو واحد شكله انه ملتزم ركب تاكسي .. نفس الكلام سواق التاكس يتحول لشيخ طريقة في ثانية

مرة ركبت تاكسي .. واول مقعدت جنب سواق التاكسي وقلت السلام عليكم

تحول في ثانية لشيخ طريقة بقه .. وقاعد يدعي ويذكر وهو كان مشغل اغاني !!ا

وخلاص حسيت انى حطّلع طبلة واقعد اقول : حي حي حي حي

وعمّال يقول :

ربنا يكرمنا يحق جاه النبي أو يارب استر طريقنا بحق جاه النبي .. حاجات كده مش فاكرها بالظبط

وشغاااال .. بقه اهو اى كلام حافظه وخلاص

قلتله ياعم وايه لازمة بحق جاه النبي ديه ؟؟

ليه مخلّي واسطة بينك وبين ربنا .. ادعي ربنا على طول

" وَإِذَا سَأَلَكَ عِبَادِي عَنِّي فَإِنِّي قَرِيبٌ "

ربنا مقالش : وإذا سألك عبادي عني فقل لهم إنى قريب
منك لربنا على طول متحطش واسطة في الدعاء بينك وبين الله.. ولو حتى كان النبي صلى الله عليه وسلم

ما علينا .. المهم .. ليه بنحب نمثّل كثير ؟!؟

كن أنت

خليك انت .. متمثلش

ومش علشان شفت اللى قدامك قال حاجه ليك مثلا ذكر ثابت ولا حاجه .. انت متعرفش رده .. مش اى كلام بقه وخلاص علشان تحسسه انك حافظ برضه ودقيقتين وتعمل كتاب تفسير

لا قول : جزاك الله خيرا وخلاص

في الرد على تهنئة او تعزية أو مواساة

قول : جزاك الله خيرا .. وخلااااص

قول شكرا ياسيدي

ونبطل تمثيييييييييييييييييييييييييييل

ومع الحلقة رقم 10

من سلسلة

" صح وغلط وقصة طريفة "

1- صح :-

صلاة الفجر

ايه اخبارك مع صلاة الفجر ؟

اه .. الحمد لله بصحى الصبح اخش اتوضأ واصلي الفجر وانزل الشغل

ده بيبقى الساعه كم ؟؟

على الساعه 8 كده ...!ا

يعنى بعد ما خرج وقتها

ده فعلا حال كثيييير من المسلمين إلا من رحم ربي

طيب فيه ناس كده برضه في رمضان ؟؟

للأسف اه ... لا لا مش ممكن .. انت بتبالغ .. مين ده اللى يضيع الفجر في رمضان ؟؟ في كثير للأسف

صلاة الفجر تشتكي كثرة الهاجرين .. صلاة الصبح تأن من قلة المصلين

مينفعش ابدا يبقى مسلم في رمضان بيصلي تراويح - لنفترض يعنى - ومبيصليش الفجر .. تيجى ازاى ديه بالله عليكم ؟

يصلي السنة ويسيب الفرض

قال رسول الله صلى الله عليه وسلم :-

" من صلى البردين دخل الجنة "
البردين : الصبح والعصر

وقال صلى الله عليه وسلم :-

" لن يلج النار أحد صلى قبل طلوع الشمس و قبل غروبها"

وقال صلى الله عليه وسلم :-

" من صلى الصبح فهو في ذمة الله "
في ذمة الله يعنى : في حماية الله

وقال صلى الله عليه وسلم :

" إن أثقل صلاة على المنافقين صلاة العشاء وصلاة الفجر، ولو يعلمون ما فيهما لأتوهما ولو حبوا "

لازم نحافظ إن شاء الله على صلاة الفجر ونكلم صحابنا ونسالهم .. ايه اخبار صلاة الفجر معاكم .. ونكلمهم علشان يصحوا و ندعوهم لصلاة الفجر

خصوصا في رمضان يعنى وعموما طول السنة

__________________________________

2 - غلط :-

خلاص فات ثلث رمضان .. وبما ان فات ثلث رمضان .. ده معناه ان فات 10 أيام من شهر رمضان

وده يقودنا إلى أننا لو فتحنا الراديو - طبعا اقصد إذاعة القرآن الكريم- قبل صلاة التراويح في يوم 10 رمضان

حتلاقى واحد حييجي وبصوت تخييين اوى - معرفش ليه لازم يبقى صوته تخين - !!ا

وهو كمان يتخن صوته -يعنى هى ناقصة - ويروح خاضك و قايل :

ها قد ولت أيام الرحمة !!! وبدأت أيام المغفرة

فقد قال رسول الله صلى الله عليه وسلم :

" شهر رمضان أوله رحمة ، وأوسطه مغفرة ، وآخره عتق من النار"

أو حتى فى بعض البرامج أو بعض أئمة المساجد
بيقولوا الحديث ده

حتى في المسجد الذي نصلي فيه .. جاء مفتى سابق لمصر وقال الحديث

بس المشكلة ان الحديث ده : منكر .. ضعيف جدا

يعنى مش بس سنده ضعيف .. لا ضعيف جدا .. وكمان متنه منكر
انظر : سلسلة الأحاديث الضعيفة للألباني حديث رقم 1569 وضعيف الجامع 2135

وبعدين ده كلام يتقال أصلا : ها قد ولت ايام الرحمة !!ا ايه خلاص مفيش رحمة تانى ؟!!ا

وبدأت أيام المغفرة !! ايه مكانش فيه مغفرة قبل كده !!ا

يعنى حتى من معناه باين انه غلط

لا شهر رمضان كله رحمة وكله مغفرة وكله عتق من النار بفضل الله عزّ جلّ

وطبعا لو سمعت حد بيقوله..

برااااااااااحه
- قصة طريفة :-

ذكر ابن الجوزي - رحمه الله - في ذكره للمغفلين من الأئمة :-
" وقرأ إمام في صلاته : (( وواعدنا موسى ثلاثين ليلة وأتممناها بعشر فتم ميقات ربه خمسين ليلة )) فجذبه رجل وقال : ما تحسن تقرا ؟ ما تحسن تحسب ؟ ."

يعنى لا عارف تقرا ولا عارف تحسب .. الراجل مستحملش راح شادّه من قفاه

كثير جدا بنبقى عايزين نقرا بسرعه أو عايزين نختم كذا مرة .. ده مطلوب جدا .. بس المشكلة

ان ساعات نقرا بسرعه جدا لدرجة اننا منبقاش عارفين احنا بنقرا ايه اصلا .. وما أبرّئ نفسي

من كثر معايزين نخلص .. نقرا من غير اى تركيز لدرجة ان لو خلصت قراءة ورجعت تكمل بعد كده .. بسبب السرعه ديه من غير تركيز

ممكن تقعد شوية مش عارف اصلا انت وقفت فين قبل كده ..
طيب هو انا قريت الأيات ديه قبل كده ولا لا !!ا

مش فاكر الآيات ديه قراها انهارده قبل كده ولا لا

تلاقي واحد تقوله وصلت لفين ؟؟ يقولك : الحمد لله في الجزء 17

في سورة ايه بقى ؟؟

يقولك مش فاكر انا في ال 17 ده المهم .. فاضل 13 جزء يا باشا واختم

بيبقى هم كثير منا هو في الجزء الكام وعايز يخلّص وخلاص ..
مش مهم هو واخد باله اصلا هو بيقرا ايه ولا لا .. ممكن ميبصش اصلا لاسم السورة اللى بيقرأها

لو حطيتله اى حاجه تانية بين القرآن ممكن يقراها وهو مش واخد باله .. قطار ماشي

المهم يجري ويخلص علشان صحابوا ميبسبقوهوش .. وغير كده انسى بقه الأحكام ديه

يعنى لا غنّه ولا مد ولا علامات وقف ولا اى حاجه .. انا عايز اوصل لسورة النااااااااااس ياعم الحاج

احكام مين

انا ناوى الشهر ده اختم بتاع 10 مرات كده ..

وهو اصلا مش فاكر اى حاجه من اى حاجه قراها من ال 10 مرات ومفيش اى آية علّقت معاه ولا فاكرها

طيب ده كلام ؟؟!ا

طبعا ده كلام غلط في غلط

لازم نحاول نختم عدة مرات لكن بتركيز ..

علشان نفهم اللى بنقراه ونقدر نتدبر

ونعرف ثلاثين وعشرة كام

___________________________________

كده خلصت الحلقة العاشرة يارب متكونوش زهقتوا ومعلش
طولت عليكم

و غدا إن شاء الله
نلتقى في الحلقة الحادية عشر

وجزاكم الله خيرا

الحمد لله وحده
والصلاة والسلام على من لا نبى بعده

ومع الحلقة رقم 11

من سلسلة

" صح وغلط وقصة طريفة "

معلش حلقة انهارده يمكن طويله شوية
.. بس قلت افضفض بدل ميحصلي حاجه

1- صح :-

قيام الليل

التراويح والتهجد

ايه اخبارك مع قيام الليل ؟؟ ايه اخبارك مع التراويح ؟؟

والله الحمد لله .. يعنى عندنا شيخ ربنا يباركله

Zenon شيخ
Turbo شيخ

ظابط وقته بالفمتو ثانية .. العشاء وال 11 ركعة تراويح في ثلث ساعه

الركعة بآية ولو الآية طويله بيقسّمها على اتنين

الحمد لله مبنتعبش خاالص من طول الوقفة

بس المشكلة اننا بنروّح بيتونا عضلاتنا شادّه من سرعة الحركات .. لما بنسلّم من الصلاة تلاقي كله بينهج !!!ا

طيب ده ايه الكلام ده ؟؟ فيه فعلا ناس كده ؟؟

نعم .. فيه عندنا مسجد بدون مبالغة بيكون خلص تراويح بالوتر قبل ما المسجد اللى بنصلي فيه يكون أقام لصلاة العشاء

يا جماعه صلاة قيام الليل تسمى قيام .. بنقوم فيها يعنى .. يعنى المستحب نطوّل شوية في القيام

احنا مش رايحين نعمل ايروبيكس ومروحين بيوتنا تانى

قال رسول الله صلى الله عليه وسلم :-

"من قام بعشر آيات لم يكتب من الغافلين ، ومن قام بمائة آية كتب من القانتين ، ومن قام بألف آية كتب من المقنطرين "

الحديث معناه أن من صلى فى قيام الليل بعشر آيات لم يكتب من الغافلين في هذه الليلة ، ومن قام بمائة آية كتب من القانتين أى من الطائعين الخاشعين ، ومن قام بألف آية كتب من المقنطرين أى من جاؤوا بقناطير من الحسنات

فأقل شئ ألا نُكتب من الغافلين .. وفي رمضان ينبغي ألا نفوّت صلاة التراويح -قيام الليل- وفي غير رمضان ليس أقل من نصلى ركعتين بعشر آيات حتى لا نكتب من الغافلين

فاحرص على المساجد اللى بتصلي بجزء في التراويح .. وجزءين أو ثلاثة في التهجد

ده شهر اجتهاد في القيام .. ويمكن لما نصلى التراويح بجزء والتهجد بجزءين نبلغ ال ألف آية ونكتب من المقنطرين والقانتين .

____________________________________

2 - غلط :-

جزء غلط انهارده مش حديث .. اقرؤا وانتوا تعرفوا

شهر رمضان هو شهر الصوم .. وشهر القيام

للأسف هناك من المسلمين من يضيّع القيام في شهر رمضان

مبيصليش اى قيام ليل في رمضان

لا تراويح ولا تهدج

تهدج اه .. واحد صاحبي من يومين بيقولى : هو الصلاة التهدج ديه بقى بتبقى امتى

قلتله صلاة ايه ؟؟ قالى تهدج

ماااااا علينا

طيب هل فعلا فيه حد ممكن يكون رمضان عدّى كله عليه ومصلاش قيام ليل ولا مرة ؟؟

للأسف اه

واحد زميلي بيقولي .. بقالى 3 سنين مصليتش تراويح ولا مرة !!!ا

والمشكلة انه مش مثلا تارك للصلاة أو مفرّط .. لا

بيصلي كل الفروض -في رمضان وفي غيره - وفي وقتها إلا الفجر للأسف

ومحافظ على الصلاة وده انا عارفه وبشوفه

طيب يعنى لو واحد تارك للصلاة قال كده .. كنا نقول ممكن .. لكن واحد مُصلّي وبقاله 3 سنين مصلاش تراويح ولا مرة !!

وللأسف السنة ديه برضه لحد دلوقتى .. ولا مرة .. رغم انى تقريبا بقوله كل مبشوفه

ومش سايبها عِند .. بس كسل ..لأنه بيقولى أنا زعلان من نفسي جدا

يعنى ممكن يبقى ناوى يصلي وعايز يروح يصلي بس يكسل

مره من سنتين .. واحد صاحبي - غير اللى فاتوا - قالى

بص انا بقه السنة ديه معاك في صلاة التواريح كلها .. كل يوم معاك

قلتله صلاة مين ؟

قالى التواريح - وده غير الأولاني بتاع التهدج- !!ا

قلتله خلاص يا سيدي .. انت معايا في صلاة التواريح

الكلام ده قبل رمضان بيوم او اتنين مش فاكر

اول يوم اشوف وشه بعدها كان يوم 25 رمضان

قلتله يعنى لا شفت وشك لا ف تواريح ولا ف تفاريح

بص احنا نقضي اللى باقى تواشيح !!ا

للأسف ده واقع .. فيه كثير من المسلمين صلاة القيام في رمضان ضايعه منهم

فما بالكم بغير رمضان .. الله المستعان

قال رسول الله صلى الله عليه وسلم عن عبد الله بن عمر - الحديث ده صحيح محدش يفتكر انه غلط -

" نعم الرجل عبد الله ، لو كان يصلي بالليل . قال سالم : فكان عبد الله لا ينام من الليل إلا قليلا ."

فلنحرص على قيام الليل خصوصا في رمضان

فكما قال رسول الله صلى الله عليه وسلم :
أفضل الصلاة بعد الفريضة صلاة الليل

فلا نضيع هذه الصلاة العظيمة .. وأهم صلاة الليل صلاة الوتر ولو ركعة واحدة بسورة الإخلاص

لازم نحافظ إن شاء الله على قيام الليل .. ونشجع اللى نعرفهم على قيام الليل .. نحاول واحنا رايحين ناخد حد معانا من صحابنا اللى ممكن يكونوا مبيصلوهاش

بس تفهمومهم الاول انه رايح يصلي التراويح .. مش التواريح

الحمد لله وحده والصلاة والسلام على من لا نبى بعده

ومع الحلقة رقم 12

من سلسلة

" صح وغلط وقصة طريفة "

1- صح :-

بالأمس تكلمنا عن أهمية صلاة الوتر

وأن نواظب عليها إن شاء الله في رمضان وغير رمضان

طيب بعد صلاة الوتر بنعمل ايه ؟؟

مفيش اكيد بنطلع من المسجد !!ا

طيب ده في رمضان .. في غير رمضان ؟؟

بطير على السرير

طيب بتقول حاجه بعد صلاة الوتر ؟؟

لا مبقلش حاجه أنا

مبتقولش اى حاجه خالص ؟؟

لا والله مقلت حاجه !ا

طيب فيه ذكر المفروض نقوله بعد صلاة الوتر ونحافظ عليه

ممم .. ذكر ... ذكر ايه ؟؟

قال رسول الله صلى الله عليه وسلم :

" كان رسول الله – صلى الله عليه وعلى آله وصحبه وسلم – يقرأ في الوتر : بسبح اسم ربك الأعلى ، وقل يا أيها الكافرون ، وقل هو الله أحد . فإذا سلم قال : سبحان الملك القدوس ثلاث مرات ."

يبقى بعد صلاة الوتر نقول : سبحان الملك القدوس ثلاث مرات

بس كده .. سبحان الملك القدوس 3 مرات .. نحفظ بقه ونقول الذكر ده بعد صلاة الوتر

________________________________________

2 - غلط :-

كثير مننا بيحاول أنه يحافظ على سنن النبي عليه الصلاة والسلام

المشكلة انك اول متيجي تعمل سنّة عن النبي عليه الصلاة والسلام

تلاقى 100 واحد واعظ وناصح

والمشكلة ان كلهم بيحاولوا يخلوك تسيب السنة ديه !!!ا

الا من رحم ربي

يعنى هما طول عمرهم ساكتين .. واول متكلموا اتكلموا علشان يخلوك متعملش السنن ديه

يبقى الولد عامل في نفسه بلاوى وييجي بقه يلتزم بسنة للنبي

يبنى سيبك من المظاهر ديه .. الدين هنا ... هناااا

ويروح مشاور على الكبد !!ا

والبنت اللى تسيبها من اللبس الأى كلام وتلتزم بالزي الإسلامي .. ميت واعظه بقه

يبنتى متعمليش كده .. انت لسه صغيرة .. وشوفي امك لبست حجاب امتى .. عيشي شبابك

واللى تبقى لابسه حجاب اى كلام .. وبلاش افصّل في الحجاب الأى كلام ده علشان الضغط ميعلاش

وحبت تلتزم بالحجاب الصحيح

نفس المواعظ بقه ..و سيبكم من المظاهر

الدين في القلب

يا سيدي

المهم ان نسبة 80% ممكن يقولوا نفس الحاجه

ايه هي ؟؟

يا أخي هو انت فاكر الدين ده مظاهر .. انت بس عامل الناس كويس

يا أخي .. ده الرسول عليه الصلاة والسلام بيقول :

" الدين المعاملة "

.............................

سمعتوا الحديث ده قبل كده ؟؟

بيتهيئلي اى واحد فتح اذاعة القرآن الكريم .. لازم يكون سمعه

تلاقى برنامج يومي .. ييجى راجل برضه صوته تخين - معرفش ايه حكاية الصوت التخين ده-

ويروح قايل :

الدين المعاملة

هذا الحديث .. لا أصل له

ليس بحديث
وانظر مقدمة المجلد الخامس من "سلسة الأحاديث الضعيفة" ص 11 للشيخ الألباني

فهذا الحديث غير صحيح .. لكن المعنى له وجه من الصحة .. كحديث الدين النصيحة

فنعلم أن هذا ليس بحديث ولو سمعنا حد بيقوله .. ننبه على ده

وبهدووووء

___________________________________________

3- قصة طريفة :-

ذكر ابن الجوزي - رحمه الله- :-

" سمع بعض الحمقى قوما يتذاكرون الموت وأهواله - بيذكّروا بعض بالموت- ، فقال : لو لم يكن في الموت إلا أنك لا تقدر أن تتنفس لكفى . "

مش قلتلكم فيه كثير بيحبوا الفزلكة

يعنى لازم يتفزك ويقول أى حاجه وخلاص .. حتى لو حاجه ملهاش معنى

وبعدين يعنى خلاص .. ساب كل حاجه في الموت وبيقول لو مفيش في الموت غير انك متعرفش تتنفس ده كفاية !!ا

كثير اوى تلاقى ناس تحب زي مبيقولوا .. ييجي في الهايفة ويتصدر

عايزين نخلي بالنا من كلامنا .. نقول كلام ليه معنى أو نسكت .. علشان محدش ياخد فكرة وحشة عننا

ولو حد واخد فكرة وحشة عن حد فينا .. ميأكدش الفكرة ديه بكلامه اللى ملوش لازمة .. لأ .. يحاول يغير الفكرة ديه

تانى حاجه .. بلاااااااااااش

الإضافات المستفزة

يعنى مثلا .. ميبقاش واحد مأتمنك على حاجه .. وانت ضيعتها .. ضاعت منك

ييجي يسالك عليها .. تقوله

بصراحه معلش انا اسف هي ضاعت منى .. وبعدين يعنى اعتبر انها ضاعت منك او اتكسرت ايه المشكلة يعنى

ايه بقه لازمة الجزء الثاني المستفز ده ؟!؟ علشان ده حصل معايا وكنت حموت فيها

خلاص لو اكتفينا بالجزء الاول انا اسف هي ضاعت منى .. خلاص كفاية .. بلاااش الاضافات المستفزة

ومثلا في حادث الدويقة الأخير في جبل المقطم - رحم الله موتى المسلمين -

يطلع علينا اللى يقول : خلاص احنا سيطرنا على الموقف !!ا

موقف ايه يا سيدي اللى سيطرت عليه .. يعنى خلاص سيطرت على جبل المقطم وان مش ممكن اى صخور تانى تقع !!ا

ياعم الحاج الله يهديك .. بلاش استفزاااااااز

المهم نقول كلام بسيط وبلاش هيافه

واستفزااااز

______________________________________________

كده خلصت الحلقة

و غدا إن شاء الله
نلتقى في الحلقة 13

وجزاكم الله خيرا

ومع الحلقة رقم 13

من سلسلة

" صح وغلط وقصة طريفة "

__________________________________________
1- صح :-

صلاة الوتر

تسأل واحد : بتصلي صلاة الوتر ؟؟

مم صلاة الوتر .. مش ديه اللى الامام بعد مبيخلص ال 8 ركعات فى التراويح يروح قايل صلاة الوتر إن شاء الله وتلاقى نص المسجد مشي ؟؟

اه هي ديه .. بتصليها ؟؟

لا بصراحه أصلي تبع النص اللى مشي

طيب بتصليها في البيت ؟؟

بيت ؟! يعنى ايه بيت ؟! هو انا حصلي تراويح في الجامع وارجع اصلي الوتر ديه في البيت كمان ؟!ا

.................................

بعد رمضان بشهرين مثلا .. نقابل حد من صحابنا

ايه اخبار صلاة الوتر معاك ؟

وتر ؟! وتر ؟! انا سمعت الاسم ده قبل كده .. سمعته فين ياربي .. سمعته فيييين ؟!ا

مش ديه تقريبا الصلاة بتاعت رمضان اللى بتبقى بعد ال 8 ركعات في التراويح ؟

!!!!!!!!!!!!!!!!!!!!

الفكرة ديه ممكن تبقى عند كثير من الناس .. ان صلاة الوتر ديه مش مهمه .. او انها خاصة برمضان

طيب ايه الصح ؟؟

الصح ان صلاة الوتر ديه مهمه جدا .. وهي اهم صلاة تقريبا في قيام الليل

فالرسول عليه الصلاة والسلام

لم يكن يترك صلاة الوتر لا في الحضر ولا في السفر

حتى في السفر الذي تقصر فيه الفروض ويُترك فيه بعض بعض السنن الرواتب لم يكن يترك صلاة الوتر

قال رسول الله صلى الله عليه وسلم :

" اجعلوا آخر صلاتكم بالليل وترا "

يعنى اللى بيسيب الإمام قبل صلاة الوتر ويمشي لغير علة - يعنى موراهوش حاجه ومشي كده من غير سبب-
ومبيصليهاش حتى في البيت مخطئ

لإن الرسول صلى الله عليه وسلم أمرنا بصلاة الوتر

واللى فاكر انها في رمضان بس غلطان .. ديه طول السنة
وسنّة مؤكده طول السنة مش في رمضان بس

وحتى إن نمت عن الوتر

قال صلى الله عليه وسلم :

من نام عن وتره أو نسيه فليصله إذا ذكره

طيب الوتر ديه كم ركعة ؟؟

أقلها ركعة .. ومش محدد لها عدد معين .. يعنى حتى لو ركعة بس تصليها قبل متنام

يبقى نحافظ على هذه الصلاة المهمه جدا .. سواء في رمضان أو غير رمضان

ركعة واحده حتى قبل مننام .. طووووول السنة مش رمضان بس

___________________________________

2 - غلط :-

واحنا في شهر رمضان كثير بيمسك المصحف ويقعد يقرأ

تيجى بعد صلاة الظهر في المسجد

تبص تلاقى واحد قاعد وفاتح المصحف وباصص فيه

تقول ما شاء الله .. الراجل بيقرأ

تستنى يقلب الصفحه .. أبدا

دلوقتى حيقلبها .. مفيش .. طيب هو بيحفظ ؟!؟

لو كان بيحفظ كان زمانه ختم

الفضول حياكلك .. رحت وسألته:

هو حضرتك فاتح المصحف على الصفحتين دول خصوصا ليه ؟؟ بيفكروك بحاجه ؟

يرد : لا مش على دول خصوصا .. أنا عادي فتحت اى صفحتين عادي كده

طيب حضرتك بتعمل ايه ؟؟ مبتقراش ليه مثلا

مفيش اصلى قريت عشر آيات بعد صلاة الفجر وحسيت ببعض الارهاق فقلت حكتفى انهارده بالعشر ايات دول

مم .. طيب حضرتك لا مؤاخذه يعنى بتعمل ايه دلوقتى ؟؟

مفيش ببص على المصحف بس

بتبص للمصحف بس ؟؟

اه انت متعرفش ولا ايه ؟؟ شباب اليومين دول اللى مش عارفين اى حاجه دول ..

تعالى يبنى لما اعلمك حديث عن الرسول عليه الصلاة والسلام

قال رسول الله صلى الله عليه وسلم :

" النظر في المصحف عبادة "

..............................

حد سمع الحديث ده قبل كده ؟؟

الحديث ده موضوع

موضوع يعنى مكذوب .. كذب يعنى

وانظر السلسلة الضعيفة للألباني حديث رقم 356 و 1586 و 1710

فنخلي بالنا من الحديث ده ونعرف انه موضوع

وزي متفقنا ..

بالشلووووووت

خلاص انت الكبير

براااحه

__________________________________________________

3- قصة طريفة :-

ذكر ابن الجوزي - رحمه الله- :-

" ذكر أبو الحسين بن برهان : دخلت مرة على بعض أصدقائي وفيهم مريض العين ومعي بعض المغفلين ، فقال له المغفل : كيف عينك ؟ قال : تؤلمني ، فقال : والله إن فلانا آلمته عينه أياما ثم ذهبت ، فاستحييت واستعجلت الخروج "

بيسأله ايه اخبار عينك ؟؟ قاله تاعباني ، قاله : والله اعرف واحد عينك كانت تعباه كم يوم وبعدين راحت

في أوقات كثير فعلا ممكن تلاقى حد " مدبّ " يعنى بيقول كلام زي الطوب

مبيفكرش في كلامه

الملافظ سعد يا عمنا

عايزين نفكر في كلامنا قبل منقوله للناس .. ساعات الناس ممكن تتشائم مننا

أو متحبش تشوفنا بسبب الكلام اللى زي الدبش ده

وخصوصا لو كان الموقف حساس

زي مرض مثلا .. منعملش زي اخونا المغفل .. لازم نديله أمل

زي واحد ربنا أنعم عليه نعمه.. بلاش نقول كلام يحسسه اننا بنحسده

قدامي مرة واحد اعرفه ربنا انعم عليه برزق .. فبيحط ايده في جيبه لقى فلوس .. قال الفلوس ديه بتاعت ايه

راح حد قايله : اه مهو من كثر الفلوس مبقتش عارف ديه ايه ولا ايه .. فعلا اتضايق جدا من الحد ده وحس انه بيحسده

زي موت لقريب واحد مثلا .. محدش يقوله خلاص متضايقش نفسك ، مهو كان ميت ميت

لازم نراعي كلامنا ونبطل الدبش .. علشان منضايقش حد مننا
ونكرهه فينا

..

_____________________________

كده خلصت الحلقة

و غدا إن شاء الله نلتقى في الحلقة 14

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 14

من سلسلة

" صح وغلط وقصة طريفة "

___________________________________

1- صح :-

من بين الحاجات المنتشرة في رمضان بين بعض المسلمين

انك تلاقى المساجد ملياانه في صلاة التراويح .. من كل الناس
.. تلاقى شباب محافظين على التراويح والتهجد كمان في المسجد في جماعه

من الناس ديه ناس بتعمل حاجه غريبة جدا

تسأله ايه أخبارك .. حتصلى الفجر فين ان شاء الله ؟

يرد : بصراحه انا حتسحر وبعدين حصلي في البيت وانام

ليه كده مش حتصلي الفجر في المسجد ؟

لا بصراحه لإنى ببقى تعبت جدا من التراويح والتهجد

طيب وبقية الصلوات بتعمل فيها ايه ؟؟

يعنى ساعات كده ممكن اصلي العصر في المسجد والباقي في البيت لإنى ببقى لسه تعبان من التراويح والتهجد فبنام بقه لحد قبل العصر أصحى اصلى الظهر في البيت والعصر ساعات انزل اصليه في المسجد

المغرب بقه فطار وكل سنة وانت طيب بقعد افطر بقه - مش فاهم يعنى نقفل المساجد في صلاة المغرب في رمضان ؟؟-

والعشاء بصليها بقه في المسجد قبل التراويح

المشكلة انى مره لقيت واحد اعرفه .. بيصلي العشاء في البيت وبعدين ينزل يصلي التراويح في المسجد !!!!ا

هى ديه بقه الحاجه الغريبة جدا

ان بعض الناس تحافظ على صلاة السنة المستحبة في المسجد جماعه .. وتسيب الفروض الواجبة عليها متصليهاش جماعه

اهو ده من العجب العجيب .. ان تلاقى ناس فاهمه الموضوع غلط

طيب ايه الصح ؟؟

الصح ان الفروض أهم وأولى من السنن

يعنى انك تصلي الفجر وبقية الصلوات في جماعه في المسجد اهم من انك تصلى قيام الليل

و المفترض ان السنن متأثرش على الفروض

قال رسول الله صلى الله عليه وسلم :

" إن الله تعالى قال: و ما تقرب إلي عبدي بشيء أحب إلى مما افترضته عليه و ما يزال عبدي يتقرب إلي بالنوافل حتى أحبه"

يبقى التقرب إلى الله بالفرائض هو أهم شئ .. ومن بعد ذلك نتقرب بالنوافل المستحبات

لكن نتقرب إلى الله بالنوافل على حساب الفرائض

فده من الفهم الخاطئ للتراويح والتهجد ولأمور الدين

فننبه على أن الأوْلى والأهم اننا نحافظ على الفروض في جماعه في المسجد وللنساء في البيوت في أول وقت الصلاة

وده طول السنة مش في رمضان بس .. ونؤكد عليها خصوصا في رمضان

_________________________________

2 - غلط :-

- قصة طريفة :-

ذكر ابن الجوزي - رحمه الله- :-

" ماتت جارية لرجل فلما دفنها ، قال : لقد كنت تقومين بحقوقي ، فلأكافئنك ، اشهدوا على أنها حرة "

!!!!

بعد ايه ياعم الحاج ؟!! لسه فاكر

عايزين نتكلم عن حاجه مهمه جدا بمناسبة الراجل ده
هي كما سماها الشيخ سامي المسيطير " قاعدة الآن "

ايه قاعدة الآن ديه ؟

يعنى لو حد صنع ليك معروف تكافؤه في ساعتها .. متأخرش المكافأه .. لو اخرتها خلاص مش حيبقالها معنى .. وممكن عقبال متيجى ترد ليه الجميل .. يكون فات الآوان

حاجه تانية .. في مناسبات الأخبار السارة وغير السارة وهي كثيره جدا

بيبقى لازم يا نهنئ و نبارك أو نعزي و نواسي

كثير ممكن نأخّر أداء الواجب بحجة أننا نبقى نأديها على الوجه الأمثل

يعنى مثلا تعرف ان صاحب ليك حصله كذا أو كذا .. واحد يقولك تعالى نتصل بيك .. تقول لا تليفون ايه وبتاع ايه

ده حبيبى انا مينفعش اكلمه في التليفون كده

انا لازم اعمل معاه الواجب صح .. لا ده حقه عليا أكبر من كده .. أنا لازم أروح أزوره

واخد معايا 3 كيلو ورد بلدي من أبو شوك علشان يقولي متتعبش نفسك بعد كده

وممكن انت تقول لغيرك : على فكرة فلان حصله كذا كلموه بقه .. وانت لسه مكلمتوش علشان حاسس ان حقه عليك أكبر من كده

فاللى انت تقوله يتصل بصاحبك وانت لسه متصلتش ..
وممكن صاحبك يتضايق لانه عرف انك عرفت ولسه مكلمتوش

رغم انك ناوى تعمل اكبر من المكالمه .. وتتأخر في أداء الواجب

لحد مييجى وقت تنكسف انك تكلمه دلوقتى .. وتقعد تقول خلاص بقه فات وقت الموضوع ده ولو كلمته دلوقتى حيقول ايه

وتلاقى نفسك لا كلمته ولا رحتله ولا أديت الواجب ولا عملت اى حاجه

لأ ... أول منعرف أى حاجه لحد من اللى نعرفهم ... سواء حاجه كويسه او وحشة

على طول بالتليفون نأدي الواجب وبعدين نروحلهم بعديها
على الأقل رسالة بالموبايل

بس نبقى أدينا الواجب في ساعتها .. لأن ده ليه أثر كبير جدا
ونخلي بالنا علشان محدش يزعل مننا

ومنتأخرش زي عم الحاج بتاع أشهدوا أنها حرة ده

_______________________

كده خلصت الحلقة الرابعة عشر يارب متكونوش زهقتوا

و غدا إن شاء الله

نلتقى في الحلقة الخامسة عشر
وجزاكم الله خيرا

ومع الحلقة رقم 15

من سلسلة

" صح وغلط وقصة طريفة "

1- صح :-

عايزين نسال شاب او فتاه

لما بتصحى الصبح بعد متكون صليت الفجر ونمت وصحيت للشغل مثلا

بتعمل ايه ؟؟

بفتح عيني .. واتاوب .. وادخل الحمام اغسل وشي وسناني كمان

وبعدين اطلع البس وانزل .. ليه حد قالك عنى حاجه ؟؟

يعنى مبتصليش حاجه ؟؟

اصلي ايه بقه منا خلاص صليت الفجر !! حصلى الفجر تانى ؟!؟ كل شوية بقه

لا الفجر ايه .. ما خلاص ..بس فيه صلاة مهمه جدااا

قال رسول الله صلى الله عليه وسلم

" في الإنسان ستون وثلثمائة مفصل فعليه أن يتصدق عن كل مفصل منها صدقة
قالوا فمن يطيق ذلك يا رسول الله قال النخاعة في المسجد تدفنها والشيء تنحيه عن الطريق فإن لم تقدر فركعتا الضحى تجزىء عنك "

الحديث معناه أن فى جسم الإنسان 360 مفصل

وعلى الإنسان أن يتصدق عن كل مفصل .. فتسائل الصحابة ومن يطيق أن يتصدق كل يوم ب 360 صدقة

فأخبرهم النبي صلى الله عليه وسلم أن صلاة ركعتى الضحى تجزء عن ذلك .. أى كأنك تصدقت عن كل مفصل فى جسدك

يبقى نحافظ على صلاة الصحى كل يوم بعد منصحى ان شاء الله او لو كنا لا ننام بعد صلاة الفجر نصليها من بعد طلوع الشمس بحوالى ثلث ساعة مثلا

حافظواااا على صلاة الضحى

________________________________________

2 - غلط :-

أى حد مننا أكيد مقصّر في بر الوالدين

إلا من رحم ربي

واتنين مننا سمعوا كلمة عن بر الوالدين

فبيقولوا لبعض : اتصدق الواحد مقصّر جدا في بر الوالدين

اه عندك حق .. وخصوصا الأم

أنا مفيش حاجه تطلبها منى أمى .. الا وتطلبها تانى

اصلى مبعملش حاجه

انا بقه أمى مبقتش تطلب منى حاجه اصلا .. وعلى طول تقول : أنا مجبتش غير حنان

حنان مين ؟؟

الشغّاله !!ا

خلاص يأست مننا

hopeless case

لا .. الأم بالذات بقه تخلي بالك

لأن الرسول صلى الله عليه وسلم قال :-

" الجنة تحت أقدام الأمهات "

......................

أظن كلنا سمعنا الحديث ده قبل كده

الحديث ده غير صحيح

هذا الحديث في أحسن أحواله ضعيف
انظر ضعيف الجامع حديث رقم 2666 والسلسلة الضعيفة حديث رقم 593

لكن هناك حديث أخر يغني عن هذا الحديث

الحديث حسّنه الشيخ الألباني رحمه الله :

فالزمها فإن الجنة تحت رجليها

وفي لفظ أخر : الزم رجلها فثم الجنة

وفي لفظ أخر ورد بصيغة المثني -للوالدين- :-

الزمهما فإن الجنة تحت أرجلهما

فلنعلم أن حديث الجنة تحت أقدام الأمهات غير صحيح
و هناك الحديث الأخر الذي يغنى عن هذا و حسنّه الألباني

وبرضه زي مكلنا متفقين .. لو سمعنا حد بيقوله

براحتكوا بقه

_____________________

3- قصة طريفة :-

ذكر ابن الجوزي - رحمه الله- :-

" قال ابن خلف : قصّ قاص بالمدينة ، فقال : رأى أبو هريرة على ابنته خاتم ذهب ، فقال : يا بنيه لا تتختمي بالذهب فإنه لهب ، فبينما هو يحدثهم إذ بدت كفه فإذا فيها خاتم ذهب ، فقالوا له : تنهانا عن لبس الذهب وتلبسه ؟ فقال : لم أكن ابنة ابي هريرة "

بس هما كلمتين

متنهاش حد عن حاجه ويلاقيك بتعملها

ومتنصحش حد بحاجه ويلاقيك مبتعملهاش .. لأن ده بيفقده الثقه فيك

عايزين نحاول نبقى قدوة لغيرنا في الخير .. ومينفعش يبقى حد قدوة وبيأمر بحاجه ويأتي بخلافها

وشئ مهم جدا .. إن لو حد شاف فيك انك قدوة ليه واكتشف انه اتخدع فيك ويلاقيك بتعمل غير اللى بتدّعيه .. بتبقى صعبة جدا عليه وبيفقد كل الثقه

ويمكن يكون سبب في انه يترك الخير ده

نفكر في ده كويس

عايزين ندعو نفسنا للخير وندعو غيرنا ونصدق فيما نقول

وممكن من وسائل الدعوه انك تقول لحد ايه رايك نشجع بعض اننا نبطل كذا او كذا .. او نوصل لكذا .. او نعمل كذا

علشان حتى لو انت مبتعملهاش وبتحاول تعملها ميتخدعش ..
يبقى عارف

وبس كده علشان اللى عمّالين يشتكوا من طول الحلقات

____

_________________________

كده خلصت الحلقة الخامسة عشر

و غدا إن شاء الله
نلتقى في الحلقة السادسة عشر

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 16

من سلسلة

" صح وغلط وقصة طريفة "

1- صح :-

اتكلمنا في جزء الصح عن كثير من الصلوات

تكلمنا عن صلاة الفروض في المسجد وعن صلاة الفجر وعن
صلاة قيام الليل وعن الوتر وصلاة الضحى

ويارب نكون كلنا التزمنا بالصلوات ديه

بس فيه صلاة مهمه جدا جدا ناس كثير برضه مبتصليهاش

ايه هي الصلاة ديه ؟؟ هي صلاة خير من الدنيا وما فيها ؟؟

ايه صلاة خير من الدنيا وما فيها ؟!؟

اه .. يعنى الدنيا كلها وما فيها لا تساوى هذه الصلاة

الصلاة ديه ما كان يتركها الرسول عليه الصلاة والسلام أبدا حتى في السفر

حتى وهو يقصر الفروض ويترك بعض السنن الرواتب

لم يكن يتركها أبدا

حتى لما فاتتهم هذه الصلاة .. صلاها الرسول بعد أن طلعت الشمس

رغم أنها سنة وليست فرض .. حد عرفها ؟؟

قال رسول الله صلى الله عليه وسلم :

" ركعتا الفجر خير من الدنيا وما فيها "

فالمعنى أن من صلى ركعتي الفجر - سنة الصبح - فذلك خير له من الدنيا وما فيها

طيب إذا كان سنة الفجر خير من الدنيا وما فيها

فما بالكم بالفرض ؟؟؟

يبقى زي متفقنا لازم نصحى إن شاء الله لصلاة الفجر في وقتها قبل طلوع الشمس

نصلى ركعتين السنة ثم ركعتين الفرض

اظبط موبايلك .. خلي صحابك يكلموك .. اظبط منبه .. نام وانت صاحي

اتصرف بس نصحى ان شاء الله لصلاة الصبح كل يوم إن شاء الله

في رمضان وغيره

_____________________________

2 - غلط :-

في أوقات كثير أوى .. بيبقى فرح حد من صحابنا أو أقربنا أو حد نعرفه

ونروح الفرح ده .. وقصدي في الفرح ده بقه الأفراح الشرعية مش الأفراح السيكي ميكي

في ساعة كتب الكتاب مثلا .. ممكن شيخ أو المأذون يقول كلمه

أو حتى في التلفزيون أو الراديو لما يتكلموا عن الزواج مثلا
أو الإحسان للزوجات

تلاقي كثييييير جداااا يقول حديث مشهور جدا

تلاقى المأذون أو اللي بيقول الكلمة

في وسط كلامه عايز يعظ الرجال بقه .. فيروح قايل :

وقال رسول الله صلى الله عليه وسلم :

" ما أكرم النساء إلا كريم و لا أهانهن إلا لئيم "

مش سمعتوه قبل كده ؟؟

اهو الحديث ده بقه

موضوع
وانظر السلسلة الضعيفة حديث رقم 845 وضعيف الجامع الصغير حديث رقم 2916

يعنى مش صحيح .. مكذوب يعنى

ليس من كلام النبي عليه الصلاة والسلام

وفيما ورد في إكرام النساء والإحسان إليهن من الأحاديث الصحيحة الكفاية إن شاء الله

لكن هذا الحديث كذب

______________________

3- قصة طريفة :-

ذكر ابن الجوزي - رحمه الله- :-

" وعن محمد بن خلف قال : مر رجل بإمام يصلي بقوم ، فقرأ : آلم غلبت الترك ، فلنا فرغ قلت : يا هذا ، إنما هو : غلبت الروم ! ، فقال : كلهم أعداء لا نبالي من ذكر منهم . "

طبعا الكلام ده مينفعش .. هذا قرآن
كلام الله .. تكلم به حقيقة

لازم نعظّم القرآن .. مينفعش نتكلم بالقرآن ونستشهد به في مواطن لا تليق بقدر هذا القرآن

مينفعش نحرّف في كلمة من القرآن علشان نهرج مع حد من صحابنا

مش بس نلاقي اللى بيحافظ على النطق السليم لكل حرف وأحيانا يتقعر في كل حرف

وهو لا يعظّم القرآن ولا يقيم حدوده

زي القارئ في أحد الصوانات اللى بيعملوها ديه

بعد مخلّص قراءة .. عايز يطفح بقه .. عايز ياكل .. مهو جاى اصلا يقرأله آيتين علشان ياخد فلوس او ياكله أكله

داخل يقول للناس اللى جايبينه :

ربنا هب لنا من لدنك لحمه !!ا

ده كلام مينفعش !! فين تعظيم القرآن

واللى يبقى بيهرج مع صاحبته -ربنا يهديهم ويهدينا - هزار غير لائق حد يعاتبهم وينصحهم يروح مستهزأ وقايل :

هي راودتني عن نفسي !!ا

واحد قاعد مع صاحبته -ربنا يتوب عليهم- .. تقوله الناس بيتكلموا عننا

يقولها : مادام مبنعملش حاجه غلط منخافش من الناس
ده ربنا قال : فلا تخشوهم واخشوني !!!ا

يا سيدي !! ده ايه التقوى ديه ؟!؟

الكلام ده موجود وبيحصل .. ديه أمثله لناس لم تعظّم القرآن فأين تعظيمنا احنا

واحد أعرفه- غفر الله له - في بداية التزامه كان اتعلم شوية ازاى يقرأ قرآن .. راح جايب بنتين كان يعرفهم وقعد يعلمهم وقاعدين مع بعض ماسكين المصحف !!ا

ده كله ينافي تعظيم القرآن .. عايزين نعظّم القرآن في نفوسنا .. مينفعش يبقى تعاملنا مع القرآن زي الأمثله اللى فاتت

مينفعش من احترامنا للقرآن يبقى يافطة مكتوبه على محل عصير : وسقاهم ربهم شرابا طهورا !!ا

مينفعش تعاملنا مع القرآن ان ميكانيكي يعلق في الورشة بتاعته آية : إن أريد إلا الإصلاح ما استطعت !!ا

مينفعش يبقى آيات القرآن ورق لاصق على ميكروباص لرد حسد أو غيره

مينفعش ان القرآن عند ناس يبقى مجرد مصحف يتحط في العربية علشان البركة ورد الحسد !! ومحدش بيقرأه

حاجات كثير اوى بتحصل واقعنا لازم نخلي بالنا منها .. وننصح اللى بيعملها

ونحاول نغير هذا المنكر وندعو الناس لتعظيم القرآن

كل واحد فينا يفتش في نفسه ويشوف كيف حاله مع تعظيم القرآن ؟؟

كل أب أو أم يزرع في أولاده من صغرهم تعظيم القرآن

ديه أمثله ولو اتكلمنا عن كل حاجه مش حنخلص وحنحتاج حلقات .. وأنا بخاف أطول وبحاول على قد مقدر اختصر

____________________________________

[

كده خلصت الحلقة السادسة عشر

و غدا إن شاء الله
نلتقى في الحلقة السابعة عشر

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 17

من سلسلة

" صح وغلط وقصة طريفة "

1- صح :-

في أيامنا هذه .. في ازمة كبيرة جدا في الشقق

يعنى الشباب اللى عايزين يتزوجوا أو اللى فقدوا الأمل
عمّالين يدوروا على شقه

والشقق بقت أسعارها غير طبيعية .. وتقسيط على 20 سنة

وبرضه مفيش فايدة

البيت في الدنيا اللى الواحد مننا حيعيش فيها بالكثير يعنى
يمكن 60 سنة كمان بقه صعب جدا أن حد يحصل عليه

واللى اخيييييرا بيعرف يجيب شقة .. حيعيش فيها قد ايه ؟؟
40 سنة مثلا أو 50

طيب محدش فكر ازاى يفوز ببيت يفضل معاه على طول

ازاى بقه على طول ديه ؟

في الجنة .. اذا كان ثمن بيت في الدنيا الفانية اللى ممكن نسيبها في اى لحظة صعب قوى كده

طيب ازاى بقه نفوز ببيت في الجنة اللى البيت فيها بقه مش زي اى بيت في الدنيا ديه

ولا الدنيا ديه كلها كده تساوى بيت في الجنة

علشان نفوز ببيت في الجنة .. الموضوع مش صعب

قال رسول الله صلى الله عليه وسلم :

" ما من عبد مسلم يصلي لله تعالى كل يوم ثنتي عشرة ركعة تطوعًا غير الفريضة، إلا بنى الله له بيتًا في الجنة "

حديث اليوم معناه أن من صلى لله كل يوم 12 ركعة غير الصلوات المفروضة بنى الله له بيتاً في الجنة

فتخيل ما هو الثمن للحصول على بيت الجنة ..

تصلى 12 ركعة تطوع في اليوم .. بس كده ؟! أه بس كده ونسال الله القبول

ركعتين قبل الفجر

اربع ركعات قبل الظهر واثنان بعده او العكس

ركعتين بعد المغرب

ركعتين بعد العشاء

نشد حيلنا ونحاول نحافظ على ال 12 ركعة كل يوم .. خصوصا احنا في رمضان

______________________________

2 - غلط :-

زي مقلنا قبل كده .. كثير قوى ممكن نقابل محبّي الإفتاء

اى حاجه يقعد يفتي وخلاص .. عارف او مش عارف لازم يقعد يفتي

في امور الدنيا او في الدين .. مش فارقه معاه

المهم واحد نفسه يعرف اجابة سؤال عنده .. فقابل صديق ليه من النوعيه ديه

فسأله سؤال التانى جاوبه على حاجه تانية خالص

فواحد سمعهم .. طبعا مش محتاجه يعنى علشان يفهم ان ده عمال يفتي

راح داخل قايله : ياعم حرام عليك .. ايه ؟؟ عماااال تفتي كده وخلاص

ان مسمعتش قول رسول الله عليه الصلاة والسلام :

" أجرؤكم على الفتيا أجرؤكم على النار "

....................

أظن كلنا سمعنا الحديث ده ..

هذا الحديث ضعيف
وانظر السلسلة الضعيفه حديث رقم 1814 وضعيف الجامع الصغير حديث رقم 147

فهذا حديث لا يصح عن النبي صلى الله عليه وسلم .. وإن صحّ معناه

فلو سمعناه نعرف انه مش صحيح وننبه على ده

برفق

______________________________________

3- قصة طريفة :-

ذكر ابن الجوزي -رحمه الله - :-

" وكان أعرابي يقول : اللهم اغفر لي وحدى ، فقيل له : لو عممت بدعائك ، فإن الله واسع المغفرة ، فقال : اكره ان أثقل على ربي "

طبعا هذا خطأ كبير .. في أحيان كثيرة بعضنا يستحي من الدعاء

بيتكسف يدعي بكل اللى هو عايزه .. مش عارف ليه !!ا
وساعات للأسف بعضنا بيحس ان اللى هو عايزه ده كبير قوى

فمبيدعيش .. زي ميكون ده كبير على الله مثلا .. و استغفر الله على ذلك

اى شئ كبير سواء كان خير تريده او شر تريد ان ينصرف

ادع الله

وملكش دعوه

ولا تعجل واستمر في الدعاء .. وفائدة مهمه جدا حبيت انقلها هنا .. هي من كلام الشيخ
" سامي المسيطير " حفظه الله

قاعدة مش شغلك

لن أسرد القصة التى ذكرها الشيخ حتى لا أطيل لكن المستفاد

لو وجدت نفسك في مأزق وضاق بك الوقت و جاءت الشيطان ليثبطك وييأسك ويقول أنها خلاص مش حتفرج والدعاء مش حيجيب نتيجة

ويحاول أنه يفقدك الأمل

قل للشيطان : مش شغلك .. ملكش دعوه
قل لنفسك : مش شغلك .. ملكيش دعوه
قل للناس جميعا : مش شغلكم .. ملكوش دعوه

أنا أدعو الكريم ... الرؤوف .. الرحيم ... وهو أعلم بحالي .. وأرحم بي من نفسي ...

يا نفس ... عليكِ الدعاء والصدق مع الله ...

وكيفية الفرج من الله تعالى ... هو يتولاه .. بكرمه ... وقدرته ... سبحانه وتعالى

وملكش دعوه كيف يقضي الله الأمر .. فوض أمرك لله وتوكل عليه .. واحسن الظن ..ثم انتظر كرم الكريم ورحمة الرحيم .. وسترى قدرة القدير

ادع انت بس والح في الدعاء ولا تيأس ولا تعجل ومتقولش دعيت وربنا مستجبش

ممكن الفرج يأتي في أخر لحظة كما في القصة التى ذكرها الشيخ

وإن شاء الله اضع القصة في مشاركة مستقله فيما بعد

الله أمرنا أن ندعوه

الدعاء هو العباده
بالمناسبة حديث الدعاء مخ العبادة غير صحيح

ومتعملش زي الأعرابي .. مفيش حاجه اسمها تثقل على الله ..

--------------------------------------------------------------------------------
كده خلصت الحلقة السابعة عشر يارب متكونوش زهقتوا

و غدا إن شاء الله
نلتقى في الحلقة الثامنة عشر

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 18

من سلسلة

" صح وغلط وقصة طريفة "

1- صح :-

بالأمس تكلمنا عن كيف تفوز ببيت في الجنة

انهارده معانا فرصة اخرى للفوز ببيت في الجنة

وحاجه سهله جداااا

سبحان الله بيت في الدنيا 100متر مربع الناس بتتعب سنين علشان تحصل عليه

لكن شوفوا رحمة ربنا بنا .. علشان تفوز ببيت في الجنة

عمل بسيط بس محتاجين اخلاص كامل وصبر على الطاعه

قال رسول الله صلى الله عليه وسلم :

" من بنى لله مسجدا بنى الله له بيتا في الجنة"

اعتقد ان الكثير منا يرى ان هذا الامر كبير عليه ولا يطيقه ولكن اذكركم بأن الامر ليس بكثره المال ولكن بالصدق والاخلاص مع الله..فقد تتصدق بجنيه فى بناء مسجد بنيه صادقه ويتقبلها الله منك وغيرك يتصدق بمئات الجنيهات بغير اخلاص ولا يتقبل الله منه

واذكركم بقول النبى صلى الله عليه وسلم..
لا تحقرن من المعروف شيئا

ودلوقتى ... كيف نساهم فى بناء المسجد؟؟؟

اغلب المساجد التى نصلى بها ...يوجد بها صندوق لاعمار المسجد...فضع فى هذا الصندوق ما تقدر عليه

وحاول اختيار المساجد اللى لسه بتتبني

وتخيل أنك بعملك هذا إن أخلصت النية وابتغيت وجه الله فلك بكل من يصلى في المسجد أو يذكر الله فيه أجر بفضل الله

ونقطة تانية مهمه جداااا
.. حتى لو كان اللى حتساهم به في بناء المسجد حيكفي بناء حتة صغيرة جدا

ففي رواية أخرى قال عليه الصلاة والسلام :

من بنى لله مسجدا و لو كمفحص قطاة أو أصغر بنى الله له بيتا في الجنة

مفحص القطاة تقريبا يساوى موضع جبهة المصلي .. والقطاة نوع من أنواع الحمام ومفحصها يعنى عشها اللى بتبيض فيه

فلا تحقرن من المعروف شيئا .. ونسأل الله أن يتقبل منا

_________________________________

2 - غلط :-

من الحاجات الغلط .. انك تلاقى ناس فعلا نظرتها للحياة سوداء

حاسس ان مفيش في الدنيا خير أبدا

فاضله يومين على الامتحان بتاعه

صاحبه يسأله ايه الأخبار ؟؟ مستعد للإختبار ؟؟

لا مش مستعد ومش عارف أذاكر وكل مذاكر ميجيليش نفس ولو جالي نفس النور يقطع .. اصلي حاسس ان الدكتور حيسقطنى لانه دكتور مش كويس ومش حينجحنى وبعدين المنهج اللى نزل كبير فمشتريتالكتاب ولو جبها مش حلحق أخلصه ولو خلصته مش حفهمه ولو فهمته مش حفتكره ولو افتكرته حيروح عليا نومة ومش حصحى للامتحان ولو صحيت ممكن يحصل حاجه وانا رايح الكلية وانت عارف الميكروباصات ولو محصلش حاجه حروح وحقعد اكتب واحل وفي الاخر

الدكتور حيسقطنى

مفيش فايده !!ا

حنسقط حنسقط .. حتى لو نجحنا حنسقط

طبعا زميله خلاص جاتله حالة نفسية وحيحجز عند دكتور نفساني

بس قبل ميحجز راح قايله :

اييييييييييه ياعم ده كله .. حرام عليك .. ده انا حسيت انى سقطت خلاص .. طيب حنعيد السنة امتى ؟؟

يا أخي .. غلط كده .. تفاءل .. ده الرسول عليه الصلاة والسلام بيقول :

" تفاءلوا بالخير تجدوه "

.................

أظن الحديث ده كثييير جدا مننا سمعه

هذا الحديث : لا أصل له
قال الشيخ الالباني : وهذا بمعنى الحديث المشهور في بعض البلاد :"تفاءلوا بالخير تجدوه".ولا أعرف له أصلاً

وكان النبي صلى الله عليه وسلم كان يعجبه الفأل الحسن

كما في الحديث الذي صححه الشيخ الألباني -رحمه الله-

" كان يعجبه الفأل الحسن ، ويكره الطيرة "

- قصة طريفة :-

ذكر ابن الجوزي - رحمه الله- :-

" وعضّ ثعلب أعرابياً فأتى راقياً ، فقال الراقي : ما عضك ؟ فقال : كلب ، واستحى أن يقول : ثعلب ، فلما ابتدأ بالرقية ، قال : وأخلط بها شيئاً من رقية الثعالب . "

!!!!

طيب متقول ثعلب يا سيدي وتخلص

ساعات كثير اوى .. لما حد بيبقى عنده سؤال أو طالب فتوى من شيخ أو عالم

بيستحي - بيتكسف- وهو بيسأل يقول كل التفاصيل أو يقول أنا عملت كذا وكذا

وده بيبقى سبب ان الجواب ممكن مبيبقاش صحيح لحالته

لأن هو أخفى على العالم أو الشيخ تفاصيل كثيره .. فخرج الجواب على حالة تانية غير حالته

و سلسله صح و غلط و قصه طريفه Separator

ده خطأ السائل .. وكما يقولون :

السؤال الصحيح الواضح نصف الجواب

طيب لما انت مكسوف عملت كده ليه !! كان الأولى أن تستحى من الله

لكن مادام عملت كده يبقى لازم توضح ده في سؤالك علشان تاخد الجواب الصحيح

وفعلا ممكن حد يستحى انه يفضح نفسه عند عالم يعرفك او كده

فالحل لكده انك لما تسأل العالم اللى يعرفك قوله واحد أعرفه عمل كذا كذا .. يعمل ايه

متتكلمش عن نفسك .. أو تروح تسأل عالم أو شيخ ميعرفكش .. علشان ترفع الحرج عنك

لكن لااااااازم توضح كل التفاصيل المهمه لو عايز فتوى صحيحه

تانى حاجه .. مش كل حاجه نقول حنروح لحد يرقينا .. أفضل الرقيا هي رقية الإنسان نفسه

والحذر الحذر من الدجالين والمشعوذين

ارقي نفسك بنفسك أو لو رقاك أحد لااازم الرقيا تكون فيه 3 شروط

1- أن تكون بكلام الله بالقرآن أو باسماء الله وصفاته أو الوارد عن النبي عليه الصلاة والسلام
2- أن تكون بالكلام العربي المعروف معناه ، مش بالتعاويذ غير المعروفة المعنى
3- أن تعتقد أن الرقيا لا تؤثر بنفسها مبتنفعش بنفسها لكن بتقدير الله

وطبعا ألا يكون فيها شرك .. وسورة الفاتحة من أنفع ما يقرأ من الرقى

وهناك من الأحاديث الوارده عن الرسول في الرقيا الكفاية في أن يقرأه الإنسان على نفسه ويرقى نفسه

مثل الفاتحه وحديث
" أرقيك .... "
وحديث " أعوذ بعزة الله وقدرته من شر ما أجد واحاذر "
وغيرهم

ونحافظ على اذكار الصباح والمساء وقراءة آية الكرسي وسور الغخلاص والمعوذتين

ونسيبنا بقه من الدجالين والكلام الفاضي ده واللى يقولك اسم الوالدة ايه واللى يقول هات كام كيلو ايه من كذا واعمل كذا كباية ويحدد عدد لحاجات ولف الورقة ديه فين والبس الحجاب ده علقه في رقبتك واللى يقعد يقول كلام وتمائم غير مفهومه والكلام الفاضي ده كله .. ده كله دجل وسحر

الرقيا الشرعية زي متفقنا ليها شروط والرقيا ملهاش أشخاص محددين .. مش شغلانه هى علشان يبقى واحد مهنته انه بيرقي الناس

ارقى نفسك بنفسك أحسن حاجه و اووووعى تروح لحد من الدجالين وإن كان ظاهرهم انه عامل فيها من اهل الصلاح

_________________________

بكده خلصت الحلقة الثامنة عشر يارب متكونوش زهقتوا

و غدا إن شاء الله
نلتقى في الحلقة التاسعة عشر

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 19

من سلسلة

" صح وغلط وقصة طريفة "

1- صح :-

في الحلقتين الماضيتين تكلمنا عن كيف تفوز ببيت في الجنة بفضل الله ورحمته

طيب اليوم نتكلم عن أسهل طريقة لتعمّر بيتك في الجنة .. ليغرس لك نخل بالجنة

قال رسول الله صلى الله عليه وسلم :

" من قال سبحان الله العظيم وبحمده غرست
له نخلة في الجنة "

مفيش أسهل من كده .. واحنا في شهر رمضان .. نريد أن نكثر من الذكر

تقول : سبحان الله وبحمده .. يغرس لك نخلة في الجنة ..
وشوف بقه نخلة في الجنة يعنى ايه .. حاجه تانيه خااااالص غير اللى بتشوفها في الدنيا

ده في الجنة شجرة يسير الراكب الجواد السريع مائة سنة لا يقطعها .. ربنا يرزقنا الجنة

يعنى فى خمس دقائق تقول سبحان الله العظيم وبحمده كم مرة ؟؟

أكثر من 200 مرة .. في 5 دقائق يغرس لك أكثر من 200 نخلة فى الجنة

سبحان الله

ساكتين لييييه ؟؟

يلا طول منتوا قاعدين راكبين عربية راكبين مواصلات ، منتظر حاجه

اقعد قول : سبحان الله العظيم وبحمده

______________________________________

2 - غلط :-

في أوقات كثير ممكن حد يتظلم

ونبقى قاعدين ناس كثير والناس عارفه ان فيه شخص عارف الحقيقه

والناس عمّاله تتكلم في الموضوع وكل الناس متحمسين يبصوا للى عارف الحقيقه ويقولوله :

هاه ايه رأيك بقه .. قلنا الحقيقه ؟؟ الكلام ده حصل ؟؟

وهو سرحان في السماء ... وعمّال يعدّ في النجوم

ياعم الحاج .. ايه اللى حصل ؟؟

مفيييييش أى رد فعل .. هو صم بكم عمي

يروح واحد قايله : يا أخي اتكلم بقه ايييييييه .. ساكت ليه

انت متعرفش ان الرسول عليه الصلاة والسلام قال :

" الساكت عن الحق شيطان أخرس "

....................

كثير أوى بنسمع ناس تنسب القول ده للنبي عليه الصلاة والسلام

و هذا الحديث لا أصل له
قال الشيخ محمد عمرو عبد اللطيف -رحمه الله- : لم أقف له على أصل صحيح ولا ضعيف عن النبي صلى الله عليه وآله وسلم ، ولا موقوفا على أحد من الصحابة أو التابعين ومتقدمي السلف رضوان الله عليهم

وطبعا يغني عن هذا ما جاء في التحذير من كتم الشهادة كقوله تعالى : ( وَلَا تَكْتُمُوا الشَّهَادَةَ وَمَنْ يَكْتُمْهَا فَإِنَّهُ آثِمٌ قَلْبُهُ)

__________________________________________

3- قصة طريفة :-

ذكر ابن الجوزي -رحمه الله- :-

" وقع رجلان على قافلة فيها ستون رجلاً ، فأخذوا مالهم وثيابهم ، فقيل لبعضهم : كيف غلبكم رجلان وأنتم ستون ؟ فقال : أحاط بنا واحد وسلبنا - سرقنا - الأخر ، كيف نعمل ؟ "

!!!!

المشكلة ان انتشر في كثير من المسلمين إلا من رحم ربي ..
حاجه خطيرة جدا .. نفس اللى حصل لل 60 رجل دول

هي :ثقافة الهزيمة النفسية

بقى فيه كثير جدا حاسيين ان اللى احنا فيه ده مش ممكن يتغير ونرجع تانى لعزّنا ونصرنا

وكثير جدا مننا معتبرين نفسهم اقل من أعدائنا بكثير
ديه الهزيمة النفسية اللى مسيطره على كثير منا

والحقيقة أننا أمة عظيمة

أمة تنهض من كبوتنا وتتحول لعملاق فجأه

مينفعش اننا يبقى من داخلنا مقتنعين ان مفيش في ايدينا حاجه واننا مهزومين مهزومين

لا .. النصر قادم والله

وهذا وعد الله ولا يخلف الله الميعاد

ولازم نعرف اننا أقوى من أعدائنا ونقدر نغلبهم .. لكن نحتاج للإيمان والصبر .. احنا مش اقل منهم

قال الله عزّ وجلّ :

" الْآنَ خَفَّفَ اللَّهُ عَنكُمْ وَعَلِمَ أَنَّ فِيكُمْ ضَعْفًا فَإِنْ يَكُنْ مِنْكُمْ مِائَةٌ صَابِرَةٌ يَغْلِبُوا مِائَتَيْنِ وَإِنْ يَكُنْ مِنْكُمْ أَلْفٌ يَغْلِبُوا أَلْفَيْنِ بِإِذْنِ اللَّهِ وَاللَّهُ مَعَ الصَّابِرِينَ "

عايزين نركز على كلمتين ( الْآنَ خَفَّفَ اللَّهُ عَنكُمْ ) و ( صَابِرَةٌ )

يعنى حتى بعد التخفيف المسلم لا يتساوى بالكافر فضلا عن يكون اقل من الكافر .. حتى بعد التخفيف مازال المسلم باثنين أو أكثر .. لكن لابد من الصبر والإيمان

لابد أن نتواصي بالصبر والإيمان والإلتزام بأحكام هذا الدين .. حتى نستحق نصر الله

لكن مينفعش ان يبقى جوانا يأس .. لأ .. لازم نعرف ان النصر جاى جاى .. واحنا اقوى منهم بإذن الله

حبيت بس اتكلم عن النقطة ديه لأن روح الإنهزام ديه بقت عند ناس كثير منا

ومش معنى ان اتنين هجموا علينا واحنا كثيييييير .. نقول
نعمل ايه واحد ضغط علينا والتانى سرقنا

ده حته مش منطقى ..

_________________________________

كده خلصت الحلقة التاسعة عشر

و غدا إن شاء الله
نلتقى في الحلقة العشرين

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 20

من سلسلة

" صح وغلط وقصة طريفة "

1- صح :-

بدأنا العشر الأواخر من شهر رمضان

فات الشهر بسرعه جداااااا .. والحمد لله على كل حال .. وإنا لله وإنا إليه راجعون

طيب ماذا كان يفعل النبى عليه الصلاة والسلام ؟؟

عن عائشة رضي الله عنها، قالت: «كان رسول الله صلى الله عليه وسلم إذا دخل العشر شدّ مئزره، وأحيا ليله، وأيقظ أهله» وفي رواية: «أحيا الليل، وأيقظ أهله، وجد، وشد المئزر»

وكانت أمنا عائشة تقول: "كان رسول الله صلى الله عليه وسلم يجتهد في العشر الأواخر مالا يجتهد في غيره"

كان الرسول صلى الله عليه وسلم يخص العشر الأواخر بأعمال أكثر من بقية الشهر

احيا ليله : المراد أنه كان يقوم كله أو أنه يقوم غالبه فلا ينام فيه الا قليلا.

أوقظ أهله : كان يوقظ أهله حتى أنه عليه الصلاة والسلام كان يطرق فاطمة وعلياً ليلا .. فعليك أن تشجع أهلك إلى القيام للصلاة وتتصل بصحابك وتنزلوا تصلوا التراويح والتهجد

شدّ مئزره : أى اعتزاله لنساءه للتفرغ لطلب ليلة القدر .. فسيبك من كل حاجه ممكن تشغل في ليالي العشر الأواخر

ومن أفضل الأشياء المعينة على احياء الليل وصلاة القيام هو عدم الأكل كثيرا في الإفطار .. فكل حاجه بسيطه وأخّر الأكل حتى تنتهي من القيام

ومن استطاع الإعتكاف فليعتكف فإن ذلك أدعى لبلوغ ليلة القدر

ففي العشر الأواخر ليلة القدر التى هى خير من ألف شهر ..

فمن الآن نبدأ فى صلاة التراويح والتهجد واحياء الليل ولا ننام أو ننام قليل جدا ساعة مثلا ونقوم مرة أخرى و نتفق مع الأصدقاء على الصلاة و تشجيع الأهل والأصدقاء حتى نٌوفق جميعا لقيام ليلة القدر إيمانا بالله واحتسابا بفضل الله تعالى

______________________________________________

2 - غلط :-

جزء غلط اليوم مش حديث

لا .. غلط اليوم هو فعل كثيييييييييييييير جداااااااااا من
المسلمين إلا من رحم ربي
في ليالي العشر الأواخر .. تلاقى في بعض الأيام زحمه وفي أيام تانية عادي خالص

تيجى بقه ليلة 27 .. تجيب معاك انبوبة اكسوجين

من كثر الزحمة خلااااص مفيش نَفَسْ

زي مبيقولوا مفيش موضع قدم .. طيب ايه الزحمة ديه ؟؟

أصل الليلة ليلة القدر وكل سنة وانت طيب وبعودة الايام رمضان كريم ياعم الحاج

.............

المشكلة بقه ان ممكن كثير من الناس اللى جاية تكون فاتها فعلا ليلة القدر

لأن ليلة القدر مش شرط يعنى انها ليلة 27

لا ممكن تبقى أى ليلة من ليالي العشر الأواخر

ولكن تُرجى أكثر في الوتر منها أكثر

يعنى ليالي 21 ، 23 ، 25 ، 27 ، 29

وممكن تبقى في الليالي الزوجية كمان فيه اقوال بكده

فكثيييير اوى بينشنوا بس على ليلة 27

وكثيييير ميروحوش يصلوا الا الليالي الفردية 23 ، 25 ،27

حتى 29 كثيييير جدا مبيصلوهاش

مخلاص بقه ليلة القدر فاتت .. مين قالك كده ؟؟

ليلة القدر ممكن تبقى في اى ليلة من العشر الأواخر ..
فنحرص إن شاء الله اننا نقوم كل ليالي العشر الأواخر لعلنا ندرك قيام ليلة القدر بفضل الله عزّ وجلّ

كل ليلة هاه .. هما 10 ليالي بس .. نشد حيلنا شوية بقه .. وبلاش اللى بيروح 27 بس ده

___________________________________

3- قصة طريفة :-

ذكر ابن الجوزي -رحمه الله- :-

" عن عمرو بن الحسن قال : خرج أهل بيت من اليمن من منازلهم حتى صاروا إلى شعب من الجبل ، فاختفوا فيه ، وقالوا : نهرب من شهر رمضان لا يدخل علينا "

!!!!

طبعا هي مش قصة طريفة يعنى انهم بيهربوا من شهر رمضان

لكن حبيت اذكرها علشان أقول

ان فيه ناس فعلا مبتحبش شهر رمضان

علشان بتحس انها مش واخده راحتها فيه

مش عارفين يعصوا براحتهم .. حتى الشلّه بتاعتهم نقصت

فيه ناس بتصلى التراويح بقه وهديت في الشهر ده

و فيه ناس زهقت من شهر رمضان .. كفاية كده بقه لسه 10 أيام كامله !!ا

وناس نفسها العشر الأواخر ديه تخلص بسرعه

وناس تعبت من قيام الليل ومن الصيام وبعد مكانت ماشية كويس

جت في العشر الأواخر و بدأت تهنج .. الرامات عندهم تعبت

وناس شدت حليها جدا في العشر الأواخر وبتقول دايما لما بنكون في سباق ونقرب من نهايته بنجيب أخرنا .. بنعمل كل اللى نقدر عليه علشان نوصل الأول وبعد السباق ممكن نريح بقه وناخد نفسنا

وناس قطّعت نفسها في العشر الأواخر لعلهم يدركوا ليلة القدر فيُغفر لهم ما تقدم من ذنوبهم ويسعدوا سعادة لا يشقوا بعدها ابدا بإذن الله عزّ وجلّ

وناس رغم اجتهادهم الشديد .. زعلانين ان شهر رمضان جري وقرّب يخلص

انت مين في دول ؟؟ وتحب تبقى مين في دول ؟؟

لازم فعلا نُري ربنا منا خير

ونظهر لربنا اننا بجد عايزين نستحق قيام ليلة القدر وعايزين نفوز بالمغفرة والجنة

عايزين نبقى مع النبي عليه الصلاة والسلام والأنبياء والصحابة في أعالى درجات الجنة

حتختار انك تبقى انهى واحد في الناس اللى فوق دول

أنا مرضاش لنفسي ولا ليكم اننا نبقى غير اللى بيموتوا نفسهم اليومين دول علشان يفوزوا بقيام ليلة القدر وبرضا الله

وافتكر انك لو في سبق أخر السباق بتبقى اكثر حته بتحاول تجري فيها

وربنا يتقبل منا ومنكم

______________________________________

كده خلصت الحلقة العشرون

و غدا إن شاء الله
نلتقى في الحادية والعشرين

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 21

من سلسلة

" صح وغلط وقصة طريفة "

تقريبا من اليوم حنبدأ نركز شوية في جزء صح لأهميته الشديده في العشر الأواخر وحنختصر في جزء غلط وقصة طريفة شوية

1- صح :-

[b]بدأنا العشر الأواخر من رمضان .. وبالأمس كانت أول ليلة وترية ..

فمن فاته قيامها فمازال أمامه الليالي القادمة فلا يضيعها لعله يدرك ليلة القدر

وحديث انهارده بقه الفرصة الثالثه .. فاكرين أول حلقتين .. لما قلنا الأحاديث اللى ثمرتها هي مغفرة ما تقدم من الذنب

انهارده الفرصة رقم 3 لنيل نفس الجائزة ..وزي مكانوا بيقولوا :

كل ما تشتري أكثر فرصتك في الفوز تكبر

وطبعا كل متزوّد الأعمال اللى ليها نفس الثواب .. يبقى فرصك في الفوز بهذ الثواب أكثر

قال رسول الله صلى الله عليه وسلم:

"من قام ليلة القدر إيمانا و احتسابا غفر له ما تقدم من ذنبه"

وليلة القدر كما نعلم خير من ألف شهر .. فهذا فضل عظيم لا ينبغي لمسلم أن يفوته ..فما احوجنا أن يُغفر لنا ما تقدم من ذنوبنا..

والمتبقي ثمان ليال تقريبا .. فينبغي على المسلم استثمار تلك الليالي لعلنا نرزق بقيام ليلة القدر إيمانا بالله واحتسابا

طيب قد يقول أحدنا أنهى ليلة هي ليلة القدر ؟؟

اختلف العلماء رحمهم الله في تحديد ليلة القدر وتُرجى أكثر في الوتر من العشر الأواخر

طيب ما علامات ليلة القدر ؟

قول الشيخ بن عثيمين رحمه الله في الشرح الممتع

علامات مقارنة

1- قوة الإضاءة في تلك الليلة وهذه العلامة لا يحس فيها بالمدن.

2- الطمأنينة أي طمأنينة القلب وإنشراح الصدر من المؤمن فإنّه يجد راحة وطمأنينة في هذه الليلة أكثر ما يجده في بقية الليالي.

3- الرياح تكون فيها ساكنة.

4- المنام.. أنه قد يري الله الإنسان في المنام كما حصل مع بعض الصحابة.

5- اللذة.. أن الإنسان يجد في القيام لذة أكثر من غيرها من الليالي.

علامات لاحقة

الشمس تطلع صبيحتها ليس لها شعاع .. صافية.

يعلق الشيخ الشنقيطي: " سبب ذلك - والله أعلم - أن الملائكة تصعد بعد الفجر إلى السماء بعد أن كانت على الأرض فتحجب شعاع الشمس، لأن الله أخبر أن الملائكة تتنزل في ليلة القدر ".

فهيا بنا إلى احياء ليلنا كما تحدثنا بالامس لعلنا نكون ممن قام تلك الليلة ايمانا واحتسابا

وأقرب ليلة هي ليلة 23 يعنى الاربعاء بليل.. اوعى تفوت هذه الليلة

ونسال الله أن يتقبل منا ومنكم

______________________________

2 - غلط :-

كثير من الشباب دلوقتى وبصراحه غير الشباب كمان متضايقين من الأحوال في البلاد مثلا

أزمات كثير أوى .. من البطالة للعيش للمرتبات للشقق للغلاء .. كفاية علشان منكتأبش

فاتنين صحاب قاعدين يفضفضوا مع بعض :

خلاص الحياة بقت صعبة في البلد ديه اوى .. انا مش عارف الحكومــات فين والشعب فين

فصحابه راح رادد عليه :

بقولك ايه .. متقعدش تقول حكومــات وكده .. انتوا لو شعب كويس حيبقوا كويسين !!ا

انت مسمعتش قول الرسول عليه الصلاة والسلام :

" كما تكونوا يولى عليكم "

..........................

حديث ناس كثير اوى بتقولوا

هذا الحديث ضعيف
وانظر السلسلة الضعيفه للألباني حديث رقم 320 وضعيف الجامع الصغير حديث رقم 4275

ولو سمعنا حد بيقولوا ..

خلاص بقه احنا في العشر الأواخر والمسامح كريم

وضّحله براحه وخلاص بقه

___________________________

3- قصة طريفة :-

ذكر ابن الجوزي -رحمه الله- :

" سمع بعض المغفلين أن صوم عاشوراء يعدل صوم سنة ، فصام إلى الظهر وأكل ، وقال : يكفيني ستة أشهر "

ّ!!!!

طبعا هو كده مخدش ثواب ستة أشهر ولا حاجه .. هو أبطل صيامه

مش عايزين احنا كمان بعد مشدينا حلينا وتعبنا في اول رمضان ونصه مثلا .. نيجى نبوظ كل اللى عملناه في أخر رمضان

فاضل 8 أيام تقريبا .. نكمل فيهم بقوة .. ونجيب أخرنا بجد
زي مقلنا بالأمس .. في نهاية السبق نحاول نعمل كل مجهودنا علشان نوصل الأول

وخلي بالك أنك فيه غيييييرك كثييييييير جدا بيموتوا نفسهم في العشر الأواخر

فانت الخسران لو منافستهمش .. وفي ذلك فليتنافس المتنافسون

وانت الوحيد الخسران لو جيت على الاخر وبوظت كل حاجه
نحاول نحافظ على كل حاجه ونزيد في الخير من كل حاجه صلاة وقيام وقراءة قرآن وصدقات وحسن خلق والبعد عن اللغو وكل أنواع الخير

فاضل 8 أيام بس فات 22 وفاضل 8 منضعيش كل حاجه بقه

وربنا يتقبل منا ومنكم

_________________________________

كده خلصت الحلقة الحادية والعشرون
يارب متكونوش زهقتوا

و غدا إن شاء الله
نلتقى في الثانية والعشرين

وجزاكم الله خيرا

الحمد لله وحده والصلاة والسلام
على من لا نبى بعده

ومع الحلقة رقم 22

من سلسلة

" صح وغلط وقصة طريفة "

زي متفقنا حنركز شوية في جزء صح لأهميته الشديده في العشر الأواخر وحنختصر في جزء غلط وقصة طريفة شوية

1- صح :-

اليوم بأذن الله ليله فرديه....ليلة 23 .. لعلها ليله القدر...فلنحرص على ان لا نعصى الله فى النهار حتى يوفقنا الله فى الطاعه باقى اليوم وخصوصاً فى الليل

وده حيكون شعارنا في الأيام اللى جاية كلها ان شاء الله

لا تعص بالنهار علشان تُوفّق للقيام بالليل

حديث اليوم هو دعاء ..نتعلمه من ام المؤمنين عائشه رضى الله عنها

عن عائشة -رضي الله عنها- قالت: قلت: يا رسول الله، أرأيت إن علمت أي ليلة ليلة القدر، ما أقول فيها؟ قال: قولي:
" اللهم إنك عفو تحب العفو فاعف عني"

يبقى نحفظ هذا الدعاء ونردده من اليوم الى اخر يوم فى رمضان بأذن الله

بقيت ايام وتنتهى ايام العشر وينتهى رمضان ..لازم نحس بالمعنى ده.... ان فاضل ايام بل ساعات وينقضى رمضان

فهل تاب الله علينا؟؟ هل رضى الله عنا؟؟؟ هل سنثبت على الطاعه بعد رمضان ام لا؟؟ هل اعتقنا من النار ام لا؟؟

نفكر في المعنى ده ونجتهد الأيام ديه

واجتهد فى الطاعه فخير الاجابه على هذا السؤال هى الاجتهاد فى الطاعه..

________________________________

2 - غلط :-

أفتكر ان مرة سمعت أحد المشايخ بيحكي عن برنامج كان بييجي في الراديو

اسمه على الناصية

كانت تيجي المذيعه وتعمل حوار مع أحد الناس وتسأله شوية اسأله

فمرة بتسأل واحد : ايه المبدأ اللى انت حاطه لنفسك وماشي عليه ؟؟

عمل فيها شيخ بقه ورايح قايل :

قول الله عزّ وجلّ في الحديث القدسي :

" اعمل لدنياك كأنك تعيش أبدا واعمل لآخرتك كأنك تموت غدا "

المذيعه : صدق الله العظيم

...........................

الحديث ده أصلا بيتقال على أنه حديث للرسول عليه الصلاة والسلام .. بس ده بقه اخترع حاجه جديده .. خلاه حديث قدسي .. والمذيعه طبعا في المحيط الهادي

هذا الحديث لا أصل له

اختراع يعنى
وانظر السلسلة الضعيفة حديث رقم 8

وطبعا لو سمعت حد بيقوله ..

ودّيه للمذيعه

_________________________________

[b][b]
3- قصة طريفة :-

ذكر ابن الجوزي -رحمه الله- :

" دعى بعض المغفلين إلى دعوة ، فاشتغل الناس بالأكل وجعل هو ينظر إلى الستور المعلقة - الستاير يعنى - ، وكانت الحيطان كلها قد سُترت ، فقيل له : مالك لا تأكل ؟! فقال : والله لقد طال تعجبي من هذه الستور الطوال كيف دخلت من هذا الباب القصير ؟؟ "

!!!

مش عارف هو مستغرب ليه .. ما أكيد حته الستاير وبعدين بنوا البيت !!ا

مش عايزين في الأيام اللى فاضله من رمضان ديه نشغل نفسنا بحاجات هايفه مش مفيده

عايزين نركز في المفيد لينا زي ما اتفقنا زي الصلاة والذكر وقراءة القرآن والقيام والدعاء والصدقة وافطار الصائمين

سيبك من الحاجات اللى ممكن تشغل وقتك وممكن تأجلها لبعد رمضان

اللى بيلعب لعبة على الكمبيوتر وقرّب يقفلها .. مش لازم دلوقتى يا سيدي .. اشغل نفسك بالمفيد

اللى كل يوم بليل يخرج يقعد مع صحابه أو عايز ينزل يشترى حاجات ممكن تتأجل .. يأجّل كل ده

[center]أى حااااااجه تقدر تأجلها أجلها .. الفطار بره مع صحابك في مائده الرحمن .. سيبك منه يا سيدي

لعب كوره مثلا .. عزومات .. زيارات عائلية .. أجلّها ياسيدي العيد جاى وحنزور كل أقاربنا

أى حاجه حتى لو مباحة وغير عاجلة وممكن تأجلها الأفضل تأجلها بعد رمضان

متشغلش نفسك غير بالمفييييييد

فما بالك بالحاجات الهايفة اللى مينفعش تفكر فيها أصلا حتى في الأيام العادية زي صاحبنا بتاع الستاير

صحيح .. حد عرف الستاير دخلت ازاى ؟؟ حيجننى الموضوع ده

___________________________

[center]كده خلصت الحلقة الثانية والعشرون يارب متكونوش زهقتوا

و غدا إن شاء الله
نلتقى في الحلقة
الثالثة والعشرين

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 23

من سلسلة

" صح وغلط وقصة طريفة "

_________________________________________

1- صح :-

اتفقنا اننا في الفترة ديه نحافظ على الأذكار ونحافظ على السنن الرواتب وعلى صلاة الضحى والوتر والقيام والفجر وسنة الفجر

بس فيه حاجه مهمه جدااااا متكلمناش عنها .. هي

الصدقة

عن ابن عباس رضى الله عنه قال:

كان رسول الله صلى الله عليه وسلم أجود الناس وكان أجود ما يكون في رمضان حين يلقاه جبريل

الحديث معناه أن الرسول صلى الله عليه وسلم كان أكثر الناس جودا بالخير .. وكان أجود ما يكون في رمضان يكثر فيه من الصدقات أكثر من غيره من الشهور

فالصدقة في شهر رمضان أفضل من غيرها .. تصدق بأى شئ ولا تحقرن من المعروف شيئا .. تصدق بأى شئ ولو بربع جنيه

ومتخافش أن يقل مالك من التصدق .. فقد أقسم الرسول صلى الله عليه وسلم انه لا ينقص مال من صدقة

وقال رسول الله صلى الله عليه وسلم

كل امرىء في ظل صدقته حتى يُقضى بين الناس

فالصدقة سبب في أن تكون فى الظل حتى يُقضى بين الناس ويُحكم بينهم

و تحب تكون من السبعة الذين يظلهم الله في ظل عرشه يوم لا ظل إلا ظله ؟؟

إذن عليك بالصدقة .. صدقة خالصة لوجه الله تخفيها عن الناس

ففي حديث السبعة الذين يظلهم الله في ظل عرشه يوم لا ظل إلا ظله قال رسول الله عليه الصلاة والسلام :

رجل تصدق بصدقة فأخفاها حتى لا تعلم شماله ما تنفق يمينه

ولا تعلم شماله ما أنفقت يمينه كناية عن المبالغة فى الإخفاء - مش فرحان اوى ان الناس شايفاك ونفسك تنادي صحابك كلهم يشوفوك وانت بتطلّع الربع جنيه

فنتفق بقه الكام يوم اللى فاضلين ميعدّيش يوم الا وتكون تصدقت بحاجه

بلاش بقه البخل ده

_________________________________

2 - غلط :-

في الايام ديه .. بقه خلاص اللغة الاجنبية في كل حته
تمشي في الشوارع المحلات كلها تقريبا اسماءها مكتوبة بالانجليزي

تيجى تتكلم مع حد تلاقى نص كلامه عمّال يدخل كلمات اجنبيه

تقوله ازيك ؟

يقولك : great

رايح انهارده التراويح ؟

Yes

حتروح لوحدك ولا مع حد ؟؟

I think حروح لوحدى

طيب يا سيدي ربنا يتقبل

I hope ربنا يتقبل

ايه ياعم هو انت لسه واقع من سيديهاية تعليم انجليزي ؟؟ ايه الحكاية ؟؟

what's the problem ??

انت مسمعتش حديث الرسول عليه الصلاة والسلام :

" من تعلّم لغة قوم آمن مكرهم "

..........................

مش سمعتوا الحديث ده كثييييير قبل كده ؟؟

هذا الحديث : باطل لا اصل له
قال الشيخ الوادعي : هذا الحديث بحث عنه الباحثون فلم يجدوا له أصلاً وقال الشيخ العلوان : لا أعلم هذا حديثاً ولا أظن له أصلاً

وزي متفقنا .. لو سمعنا حد بيقوله ؟؟

نقوله

NO .. This is Wrong

______________________________________

[3- قصة طريفة :-

ذكر ابن الجوزي -رحمه الله- :

حكى أسحاق بن إبراهيم قال : حضرت جنازة لبعض القبط - النصارى- ، فقال رجل منهم : من المتوفِّي؟ فقلت : الله ، فضُربتُ حتى كدت أموت "

هو الراجل مغلطش بس المشكلة انه قال الكلام في مكان غير مناسب أو قاله بطريقة غير مناسبة

موضّحش قصده

يعنى هما بيسألوه من المتوفِّي -بكسر الفاء المشدده- اسم فاعل فهو رد : الله ، لأن الله هو الذي يتوفى الأنفس .. اما الميت يُقال عنه متوفًّى - بفتح الفاء المشدده- اسم مفعول

فمفهموهوش فمسكوه ضربوه لحد مكان حيموت

فنخلي بالنا اننا منتفزلكش يعنى ونكلم الناس بكلام ميفهموهوش حتى لو كان صح .. بس المكان والزمان غير مناسب .. ممكن توصل المعنى بطريقه تانية أسهل وبرضه تبقى وصلت المعنى الصح

زي واحد ربنا يهديه برضه تابع لجماعه كان راح يدّي درس في الأرياف .. فبيقرأ من كتاب تفسير

وجه عند قوله تعالى : " كَمَثَلِ غَيْثٍ أَعْجَبَ الْكُفَّارَ نَبَاتُهُ

و راح قايل : والكفار هم الفلاحون

النور اطفأ بقه والرقابة تدخلت لحذف المشاهد
وحصلّه نفس اللى حصل للأخ اللى فوق ده

ونفتكر قول سيدنا علي بن أبي طالب :

" حدثوا الناس بما يعرفون أتحبون أن يكذًّبَ الله ورسوله "

يعنى كلموا الناس باللى يفهموه .. متقعدش بقه قدام ناس بسيطة أو مش متعمقه .. تتكلم بفزلكة في دقائق الأمور زي متكون قاعد قدام طلاب علم متقدمين

لكل مقام مقال

وزي مقال سيدنا ابن مسعود رضى الله عنه :

" ما من رجل يحدث قوما بحديث لا تبلغه عقولهم إلا كان لبعضهم فتنة "

فنخلّي بالنا وبلاش نتعامل مع كل الناس في كل حاجه على انهم على علم شيخ الإسلام

ولو حد سألك سؤال جاوب عليه ببساطة .. بطريقه توصله بسهوله ويفهمها

ونحاول في أى حاجه بنوضحها لأى حد سواء في أمور الدين أو الدنيا .. أننا نوضحها ببساطه

وخلي بالك من القبط خصوصا .. اديك شايف عملوا في الراجل ايه

ومش عايز أفسّر بقه

__________________________

كده خلصت الحلقة الثالثة والعشرون

و غدا إن شاء الله
نلتقى في الرابعة والعشرين

وجزاكم الله خيرا

الحمد لله وحده والصلاة والسلام على من لا نبى بعده

ومع الحلقة رقم 24

من سلسلة

" صح وغلط وقصة طريفة "

زي متفقنا حنركز شوية على جزء صح للأهميه في هذه العشر ونختصر شوية في جزء الغلط والقصة

________________________________________

1- صح :-

معلش يمكن حنعيد تانى اللى قلناه من حلقتين بس لأهميته

الليلة إن شاء الله ليله فرديه.... هي ليلة الخامس والعشرين .. و وارد جداااا جداااااا أنها تكون ليلة القدر

فبنأكد تانى أننا نحرص على ان لا نعصى الله فى النهار حتى يوفقنا الله فى الطاعه باقى اليوم وخصوصاً فى الليل

والدعاء اليوم هو دعاء ليلة القدر .. نكرره للتذكره

عن عائشة -رضي الله عنها- قالت: قلت يا رسول الله، أرأيت إن علمت أي ليلة ليلة القدر، ما أقول فيها؟ قال: قولي: " اللهم إنك عفو تحب العفو فاعف عني"

اذن فلنكثر من ترداد هذا الدعاء هذه الليلة .. ولنحرص على قيام هذه الليلة فلنصلى الليلة التراويح والتهجد

فاحتمال أن الليلة هي ليلة القدر كبير ..

ونتذكر سريعا قول رسول الله صلى الله عليه وسلم:

من قام ليلة القدر إيمانا و احتسابا غفر له ما تقدم من ذنبه

وليلة القدر كما نعلم خير من ألف شهر .. فهذا فضل عظيم لا ينبغي لمسلم أن يفوته ..فما احوجنا أن يُغفر لنا ما تقدم من ذنوبنا.

والمتبقي ست ليال تقريبا .. فينبغي على المسلم استثمار تلك الليالي لعلنا نرزق بقيام ليلة القدر إيمانا بالله واحتسابا

واحرص على ألا تحرم قيامها

ففي الحديث الذي حسّنه الشيخ الألباني رحمه الله :

" إنّ هذا الشهر قد حضركم وفيه ليلة خير من ألف شهر، من حُرِمها فقد حرم الخير كلّه، ولا يحرم خيرها إلاّ محروم

ولعلنا نكون من عتقاء الله من النار في أى ليلة من تلك الليالي
واللى يقدر يصلي التراويح ويفضل في المسجد لحد متخلص صلاة التهجد يعمل كده

عايزين يبقى هدفنا ندرك ليلة القدر ونحسن قيامها إيمانا بالله وإحتسابا

ونكون ممن قام رمضان إيمانا واحتسابا بفضل الله تعالى
وتقبل الله منا ومنكم

ولا تنسونا و المسلمين من صالح دعائكم في هذه الايام المباركة

_______________________________________

2 - غلط :-

غلط انهارده مش حديث

ابسطوا بقه علشان الناس اللى عمّاله تقولي اتكلم عن العادات الخاطئة شوية في جزء غلط

أمال جزء قصة طريفه ده بيعمل ايه ؟؟

غلط انهارده فهم خاطئ لآية وحديث

وهي أن ليلة القدر خير من الف شهر

كثيييييييير جدااااا نلاقى اللى بيتكلم عن ليلة القدر يقول :

وهذه الليلة تساوى عبادة 84 سنة تقريبا

مش سمعتوا ده كثير جدا ؟؟

الغلط انها لا تساوي عبادة 84 سنة .. يعنى لا تساوي عبادة ألف شهر

لكن هي أفضل من 84 سنة .. أفضل من الف شهر

لأن الله عزّ وجلّ قال : " لَيْلَةُ الْقَدْرِ خَيْرٌ مِنْ أَلْفِ شَهْرٍ "

وخير هنا أصلها أخير - اسم تفضيل- وحذفت الهمزة للتخفيف

يعنى ليلة القدر أفضل من ألف شهر

أفضل بقد ايه ؟؟ الله أعلم

ولكن ده يدل على فضلها العظيم .. فاحرص على ألا تحرم قيامها

_______________________________

3- قصة طريفة :-

ذكر ابن الجوزي -رحمه الله- :

" قال بعض الناس لمملوكه : اخرج وانظر هل السماء مصحية أو مغيمة -السماء صافية ولا مغيمه -، فخرج ثم عاد فقال : والله ما تركني المطر انظر هل هى مغيمه أم لا "

!!!!

بسبب ان الناس نِفسها تعرف خلال العشر الاواخر الليلة ليلة القدر ولا لأ

كل ليلة يقعدوا يبصوا في السماء ..

وكل واحد بقه يبتدى يتخيل

بيتهيئلي السماء انهارده صافية شكلها هي ليلة القدر

التاني : لا فيه سحابه هنااااااك اهيه .. تبقى مش ليلة القدر .. انا جد جد جدي قالى ان مش ممكن ابدااا اشوف فيها سحابه

واللى يتخيل انها مش ليلة القدر تلاقيه كسّل عن القيام وكأن خلاص بقه متأكد ان ديه مش ليلة القدر

ويمكن يكلم صحابوا اللى كانوا رايحين يصلوا تراويح وتهجد يقولهم يا جماعه مش لازم انهارده

مش ليلة القدر تعالوا نروح بقه نقضي الليلة فى اى مكان ونبقى نصلي بكره

تحس انه خد توكيل ابليس

يا جماااااعه علامة ليلة القدر زي مقلنا اللى ممكن تعرفها من النظر للسماء هي

قوة الإضاءة في تلك الليلة وهذه العلامة لا يحس فيها بالمدن.

ميتحسش بيها في المدن

يعنى محدش يقعد بقه كل ليلة يعمل فيها خبير ارصاد قوية
سيبكم من النظر للسماء ده كل ليلة وكل واحد يبتدي يقول النشرة الجوية

محدش حيحس بالعلامة ديه في المدن .. ريحيوا نفسكم

ونركز اننا نجتهد في كل الليالي ونقومها

بغض النظر بقه شايفين السماء صافيه ولا مغميه ..

ومتسمعش كلام حد يقولها بصيت في السماء وشكلها مش هي

خصوصا لو كان زي أخينا اللى فوق بتاع المطر

__________________________

كده خلصت الحلقة الرابعة والعشرون يارب متكونوش زهقتوا

و غدا إن شاء الله
نلتقى في الخامسة والعشرين

وجزاكم الله خيرا

» بالفديو سلسله ازمه أخلاق كامله